حضرت عبداللہ بن اَبِی اوفٰی رضی اللہ عنہ سے روایت ہے کہ رسولﷺ نے ارشاد فرمایا کہ جس سے اللہ کی کوئی حاجت ہو یا کسی بندہ سے کوئی حاجت ہو تو وضو کرے، اور اچھی طرح وضو کرے پھر دو رکعتیں پڑھ کر اللہ کی تعریف کرے، اور نبی کریمﷺ پر درود شریف پڑھے، اور پھر اللہ سے یُوں دُعامانگے۔
اللہ کے سوا کوئی معبود نہیں ہے جو حلیم اور کریم ہے، اللہ پاک ہے جوعرش عظیم کا رب ہے، اور سب تعریفیں اللہ ہی کے لیے ہیں، اے اللہ میں تجھ سے تیری رحمت کو واجب کرنے والی چیزوں کا اور ان چیزوں کا سوال کرتا ہوں جو تیری مغفرت کو ضروری کردیں، اور ہر بھلائی میں اپنا حصّہ اور ہر گناہ سے سلامتی چاہتا ہوں، اے اللہ تو میرا کوئی گناہ بخشے بغیر اور کوئی رنج دُور کیے بغیر اور کوئی حاجت جو تجھے پسند ہو پوری کیے بغیر نہ چھوڑ۔ اے سب سے زیادہ رحم فرمانے والے۔
