سوال

اگر کسی شخص نے کسی بزرگ کے ہاتھ  پر بیعت کی ہو اور اس شخص سے کوئی گناہِ  کبیرہ سرزد ہو گیا  ہو تو کیا ایسے میں دوبارہ بیعت کی ضرورت ہے (یعنی کیا اس سے بیعت ٹوٹنے یا کوئی اور نقصان پہنچنے کا خدشہ ہے؟)

جواب

صورتِ  مسئولہ میں گناہِ  کبیرہ سرزد ہونے کی وجہ سے بیعت ختم نہیں ہوئی، بلکہ جو گناہ سرزد ہوا ہے  اس پر اللہ تبار ک وتعالی سے  صدقِ دل سے معافی مانگی جائے، توبہ یہ ہے کہ دل سے پشیمان ہو، اس گناہ کو فورًا ترک کردے اور آئندہ نہ کرنے کا پختہ عزم ہو اور اللہ کی طرف ندامت کے ساتھ رجوع ہو۔

ہاں شیخ سے مسلسل رابطہ رکھنا چاہیے اور  شیخ   کی نصیحتوں  پر عمل  کرنا چاہیے، گناہ ہونے کے بعد شیخ کو اپنا گناہ بتانا ضروری نہیں ہے، خصوصًا توبہ کرلینے کے بعد، البتہ اگر گناہ چھوٹ نہ رہا ہو تو  اپنا راز فاش کیے بغیر شیخ کو  اپنی کفیت بتا  کر  اخلاص کے ساتھ شیخ کی ہدایات اور نصائح پر عمل کرنا اصلاح کے لیے مفید ہوتاہے۔ فقط واللہ اعلم