سوال

 ایک شخص سردیوں میں گاجر کا جوس فروخت کرتا تھا, اس کو پیسوں کی ضرورت تھی،میں نےاس سے کہا کہ آپ کوایک لاکھ روپے دیتا ہوں آپ مجھے اپنے کاروبار میں شریک کر لو ،نفع میں دونوں برابر کے شریک ہوں گے، جب آپ کی ضرورت پوری ہوجاۓ میرےپیسے واپس کردینا اورشرکت ختم ہوجاۓ گی۔ وہ راضی ہوگیا ، نقصان کا کوئی  ذکر نہیں کیا ،اب آیا میرے لیے یہ نفع جائزہے کہ نہیں؟

جواب

صورتِ مسئولہ میں مذکورہ عقد  فقہی اصطلاح میں "شرکت"   نہیں ہے، شرکتِ اموال کے لیے  سرمایہ کا نقد ہونا ، متعین ہونا اور دونوں طرف سے ہونا ضروری ہے۔  البتہ مذکورہ معاملہ "مضاربت"  کا ہے، یعنی آپ کے پیسے ہیں اور کام کرنے والے کی محنت ہے، اس صورت میں طے شدہ معاہدہ کے مطابق نفع دونوں میں آدھا آدھا تقسیم ہوگا، اور اگر کچھ نفع نہ ہوا یا نقصان ہوا تو اس کام کرنے والے کو کچھ نہیں ملے گا اور نقصان کا تاوان اس کو نہیں دینا پڑے، بلکہ  خسارہ ہو تو وہ صرف رب المال (یعنی آپ) کو برداشت کرنا ہوگا۔ فقط واللہ اعلم