سوال

 آیت  {ومن کان فقیرًا فلياكل بالمعروف}  میں  ’’أكل بالمعروف‘‘  سے حق الخدمت  مرادہے یا قرض؟ مفتی بہ قول کیا ہے ؟

جواب

یتیم کا ولی اگر غریب اور محتاج ہو تو یتیم کی پرورش کے بدلہ یتیم کے مال میں سے حسبِ ضرورت بطورِ حقِ خدمت خود پر خرچ کرنے کی اجازت اللہ تعالیٰ نے اسے اس آیت میں دی ہے۔

’’تفسیر عثمانی‘‘ میں ہے:

’’یعنی یتیم کا مال ولی اپنے خرچ میں نہ لائے اور اگر یتیم کی پرورش کرنے والا محتاج ہو تو البتہ اپنی خدمت کرنے کے موافق یتیم کے مال میں سے تحقیق لے لیوے، مگر غنی کو کچھ لینا ہرگز جائز نہیں ‘‘۔

’’بیان القرآن‘‘ میں ہے :

’’چوں کہ یتامیٰ کے ولیوں کو ان کے مال میں ہر قسم کے تصرف سے روکا تھا؛ اس لیے اب یہ بھی بتانا ضروری تھا کہ بطورِ حق الخدمت کچھ لینا جائز ہے یا نہیں، سو حق الخدمت کو بھی اس حد تک محدود کردیا کہ جو شخص انتظام کرتا ہے وہ اپنا کوئی ذریعہ معاش نہیں رکھتا تو لے سکتا ہے، ورنہ نہیں‘‘۔

’’معارف القرآن‘‘ میں ہے:

’’آخر آیت میں اس کا ضابطہ ارشاد فرمایا کہ جو شخص کسی یتیم بچے کی تربیت اور اس کے مال کی حفاظت میں اپنا وقت اور محنت خرچ کرتا ہے، کیا اس کو یہ حق ہے کہ یتیم کے مال میں سے اپنا حق الخدمت کچھ لے لے؟ چنانچہ فرمایا : {ومن كان غنيًّا فليستعفف}  یعنی جو شخص حاجت مند نہ ہو ، اپنی ضرورت کا تکفل کسی دوسرے ذریعہ سے کرسکتا ہو ، اس کو  چاہیے کہ یتیم کے مال میں سے حق الخدمت نہ لیا کرے، کیوں کہ یہ خدمت اس کے ذمہ فرض ہے، اس کا معاوضہ لینا جائز نہیں، پھر فرمایا : {ومن كان فقيرًا فليأكل بالمعروف} یعنی جو ولی یتیم، فقیر محتاج ہو اور دوسرا کوئی ذریعہ معاش نہ رکھتا ہو وہ یتیم کے مال میں سے ایک مناسب مقدار کھا سکتا ہے جس سے حاجات ضروریہ پوری ہوجائیں‘‘۔ فقط واللہ اعلم