کچھ لوگ وضو کے بعد والی دعا پڑھتے وقت آسمان کی طرف دیکھ کر دعا پڑھتے ہیں کیا یہ سنت ہے؟ اور کچھ لوگ تو اس وقت آسمان کی طرف شہادت والی انگلی سے اشارہ بھی کرتے ہیں کیا یہ سنت ہے یا احناف کی کسی مستند فتوی کی کتاب میں وضو کے بعد ایسا کرنے کا لکھا ہے؟
وضو کے بعد کی دعا حدیث سے ثابت اور سنت ہے اور اس وقت آسمان کی طرف دیکھنا بھی سنن ابی داؤد کی روایت میں مذکور ہے، لیکن انگلی سے اشارہ کرنا حدیث سے ثابت نہیں ہے۔ البتہ فقہ حنفی کی مستند کتاب حاشیۃ الطحطاوی علی مراقی الفلاح میں وضو کے بعد کلمہ شہادت پڑھتے وقت آسمان کی طرف دیکھنے کے ساتھ شہادت کی انگلی سے اشارہ کرنے کا ذکر بھی ہے. اسی طرح حضور صلی اللہ علیہ وسلم سے خطبات وغیرہ میں شہادتین کے کلمات ادا کرتے وقت شہادت کی انگلی سے اشارہ ثابت ہے۔
بنا بریں وضو کے بعد کلمہ شہادت پڑھتے وقت انگلی کے اشارے کوسنت تونہیں کہاجائے گا، لیکن اگر کوئی کلمہ شہادت پڑھتے وقت آسمان کی طرف نگاہ کرنے کے ساتھ شہادت کی انگلی سے اشارہ بھی کرے تو اسے منع بھی نہیں کیا جائے گا۔ فقط واللہ اعلم
فتوی نمبر : 143802200015
دارالافتاء : جامعہ علوم اسلامیہ علامہ محمد یوسف بنوری ٹاؤن