سوال

ہم پانچ بھائی ہیں، میرے والد نے 25 سال پہلے گھریلو جھگڑے کی بنا پر مجھے بیوی بچوں سمیت بغیر کوئی  حصہ دیے گھر سے بے دخل کر دیا تھا۔اس وقت میرے والد کی جائیداد میں10 لاکھ روپے اور ایک 1200 فٹ کا مکان اور دو کرائے کی دکانیں تھیں، چوں کہ اس زمانے میں دکانوں سے کوئی خاص منافع نہیں مل رہا تھا، مگر اب میرے والد کا انتقال ہو چکا ہے اور میرے باقی چار بھائیوں نے اس دکان میں سے والد کے زیر کفالت رہ کر جائیدادیں بنا کر اپنے نام کر رکھیں ہیں۔اب میراث کے تقسیم کے وقت وہ مجھے سوائے 1200فٹ مکان کے میرے بے دخل کرنے کے بعد دکانوں سے کما ئی گئی جائیداد میں یہ کہہ کر حصہ نہیں دے رہے کہ وہ ہم نے اپنی محنت سے بنائی ہیں۔کیا میرا اس جائیداد میں جو میرے بھائیوں نے باپ کی دکان میں کاروبار کرکے بنائی ہیں حصہ نہیں بنتا ؟

جواب

صورتِ مسئولہ میں اگر بھائیوں نے والد کی دوکان میں اپنا کام شروع کیا تھا اور اس میں محنت کرکے جائیداد بنائی ہے تو اس میں سائل کا حصہ نہیں ہوگا، یہ ان ہی بھائیوں کی شمار ہوگی۔

اور اگر کاروبار والد کا تھا اور اسی کاروبار کو بھائیوں نے آگے بڑھایا ہے اور اس سے جائیداد بنائی ہے تو یہ اضافی جائیداد بھی والد ہی کا ترکہ شمار ہوگی اور دیگر ورثاء کی طرح سائل کابھی اس میں حصہ ہوگا ۔فقط واللہ اعلم