شادی کے موقع پر شرائط میں طلاق کی صورت میں جائیداد اور بیوی کے لیے ماہانہ ذاتی خرچہ تحریر کروانا شرعاً کیسا ہے ؟
واضح رہے کہ طلاق سے باز رکھنے کے لیے جائز شرائط طے کرنا شرعاً جائز ہے، البتہ سوال میں ذکر کردہ طریقہ کار میں سے دونوں طریقے اختیار کرنے کی شرعاً اجازت نہیں، اس لیے کہ مذکورہ طریقہ کار میں طلاق دینے پر جائیداد نام کرنے اور ماہانہ اخراجات کے نام پر خرچہ کی ادائیگی کی شرط لگانا مالی جرمانہ لگانے کی قبیل سے ہے، جس کی شرعاً اجازت نہیں، البتہ طلاق کی صورت میں عدت کے دوران مطلقہ بیوی کے نان و نفقہ و رہائش کی فراہمی کی ذمہ داری شرعاً شوہر پر ہوتی ہے۔ فقط واللہ اعلم
فتوی نمبر : 144008200545
دارالافتاء : جامعہ علوم اسلامیہ علامہ محمد یوسف بنوری ٹاؤن