سوال

نوک دار گولی والی بندوق سے شکار کرنے کی صورت میں اگر  "بسم اللہ"  پڑھ  لی جائے تو پرندہ بغیر ذبح کیے حلال ہو گا جب کہ گولی پرندہ کے پیٹ میں لگی ہو نہ کہ گردن پر؟

جواب

شکار  کے لیے مخصوص ایسی نوک دار تیز دھارگولی جو بغیر بندوق کے بھی آلہ جارحہ کے طور پر استعمال کی جاسکتی ہو اسے چلاتے ہوئے اگر "بسم اللہ"  پڑھ  لیا جائے تو اس سے کیا جانے والا شکار حلال ہوگا،  اگرچہ گولی بدن کے کسی بھی حصہ پر لگی ہو ،باقی اگر گولی ایسی نوک دار نہیں ہے جو بذاتِ خود آلہ جارحہ ہو تو اس سے کیا جانے والا شکار اس وقت حلال ہوگا جب اسے زخمی حالت میں  شرعی طریقے سے ذبح  بھی کر لیا جائے۔

فتاوی شامی میں ہے:

"ولایخفی أن الجرح بالرصاص إنما هو بالإحراق و الثقل بواسطة اندفاعه العنیف إذ لیس له حدّ فلایحلّ، و به أفتی ابن نجیم." (476/1) 

تبیین الحقائق میں ہے :

"والأصل أنّ الموت إذا حصل بالجرح بیقین حلّ، و إن بالثقل أو شكّ فیه فلایحلّ حتمًا أو احتیاطًا." (129/7 ط: بیروت)

فقط واللہ اعلم