سوال

(۱)نام رکھنے کے حوالے سے شریعت کی تعلیمات کیا ہیں ؟یعنی کس چیز کو مدنظر رکھنا چاہیے؟

(۲)نومولود بچے کا نام رکھنے کا حق کس کو ہے؟ اگر بچے کا داد،  یا دادی کوئی نام رکھیں اور بچے کے والد یا والدہ اس نام کو ناپسند ہونے کی بناپرکوئی اور نام رکھیں، تو کیا یہ والدین کی نافرمانی شمار ہوگا؟

(۳)بچی کا نام ’’حور ‘‘رکھنا شرعاً  کیسا ہے؟اور اس کا مطلب کیا ہے؟

جواب

1) نام رکھنے کے حوالے سے اسلامی تعلیمات یہ ہیں کہ بچہ کانام اچھی نسبت والاہو  یا  اچھے معنی والاہو۔

2) نام رکھنے کا حق والد کا ہے،  تاہم اگر بچے کے دادا یا دادی کوئی نام تجویز کریں اور اس میں کوئی شرعی خرابی نہ ہو  تو آداب اور اخلاقیات کا تقاضا یہ ہے کہ ان کی خوش نودی  کی خاطر اپنی رائے چھوڑدی جائے، اس معاملہ میں والدین کی  ناراضی مول لینا صحیح نہیں، ہاں پیار محبت سے ان کو قائل کرنے کی کوشش کرنا منع نہیں ہے، اور یہ نافرمانی میں شمار نہیں ہوگا، اسی طرح اگر ان کے تجویز کردہ نام میں کوئی شرعی خرابی ہو تو اس خرابی کی وجہ سے وہ نام نہ رکھنے میں بھی امید ہے کہ نافرمانی شمار نہیں ہوگی ۔

3) ’’حور‘‘  جنت کی ایک مخلوق کا نام ہے،  اسے خوب صورتی کے معنی میں استعمال کیا جاتا ہے،  لہذا ’’حور‘‘  نام رکھنا درست ہے۔ بہتر یہ ہے کہ صحابیات کے ناموں سے کسی نام کا انتخاب کرلیا جائے۔فقط واللہ اعلم