سوال

1 ۔ میت (عورت) کو غسل دینے کا طریقہ بتائیں!

2۔  کیا بنا گواہوں کے بحالتِ مجبوری یا اندیشہ گناہ ہو تو  ایک لڑکا اور لڑکی نکاح کرسکتے ہیں، اگر وہ ایک دوسرے کو پسند بھی کرتے ہوں،  دلی طور پر قبول کر کے اس وعدے کے ساتھ کہ مناسب وقت آتے ہی گواہوں کی موجودگی میں نکاح کیا جائے گا؟

جواب

عورت کو غسل دینے کا طریقہ بھی وہی ہے جیسا کہ مردوں کا ہے، البتہ عورت کو عورت ہی غسل دے جو حیض و نفاس سے اور جنابت سے پاک ہو، اس کا شوہر بھی غسل نہ دے۔ غسل کا تفصیلی طریقہ یہ ہے:

غسل کی تیاری میں مندرجہ ذیل چیزوں کا اہتمام کر لیں: 
 بیری کے پتے ڈال کرپانی نیم گرم کرلیں ، ورنہ سادہ پانی ہی کافی ہے ۔ 

غسل کے تختہ کو طاق عدد میں لوبان ،اگر بتی یا کسی خوشبو دار چیز کی دھونی دے دیں ۔
میت کے ستر پر (ناف سے لے کر گھٹنوں سمیت) موٹا کپڑا ڈال کر بدن کے کپڑے اتار لیں ،وہ کپڑا اتنا موٹا ہونا چاہیے کہ بھیگنے کے بعد بدن نظر نہ آئے ۔
جس جگہ غسل دیا جائے وہاں پردہ ہونا چاہیے ۔ (ہندیہ : 1/158)
سب سے پہلے میت کو استنجا کرایا جائے گا ، اس کا طریقہ یہ ہے کہ ہاتھوں میں دستانے پہن کریا کوئی موٹا کپڑا لپیٹ کر میت کے ستر پر موجود کپڑے کے اندر اندر ہی سے دھویا جائے گا۔  شرم گاہ یا رانوں کے حصے کو بلا حائل چھونا ، یا دیکھنا درست نہیں ۔
پھر میت کو وضو کرائیں،میت کو وضو کرانے میں کلی اور ناک میں پانی ڈالنے کا عمل نہیں کیا جائے گا ، اسی طرح گٹوں تک ہاتھ بھی نہیں دھلائے جائیں گے ۔ بلکہ روئی کو تر کر کے دانتوں ، مسوڑھوں اور ناک کے دونوں سوراخوں میں تین تین مرتبہ پھیر دی جائےگی ، یہ کرنا ضروری نہیں ہے ، لیکن اگر میت کا حیض و نفاس یا جنابت کی حالت میں انتقال ہوا ہو تو یہ کرنا ضروری ہو جاتا ہے ۔اُس کے بعد ناک ، منہ اور کانوں میں روئی رکھ دیں ، تاکہ وضو اور غسل میں پانی اندر نہ جائے ۔ پھر پہلے چہرہ پر پانی ڈالیں گے ، پھر دونوں ہاتھ کہنیوں سمیت دھوئیں گے ، پھر سر کا مسح کرایا جائے گا ، پھر دونوں پاؤں کو دھوئیں گے ۔
میت کے جسم پر تین مرتبہ پانی بہایاجائے گا : پہلی اور دوسری مرتبہ بیری کے پتوں میں پکا ہوا پانی اور تیسری مرتبہ کافور ملا ہوا پانی بہائیں گے ۔ 
پانی بہانے کی تفصیل یہ ہے : وضو کے بعد پانی بہانے سے قبل میت کے سر کو صابن وغیرہ سے خوب مَل کر دھویا جائے گا ۔پھر مُردے کو بائیں کروٹ پر لٹا کر بیری کے پتوں میں پکایا ہوا نیم گرم پانی دائیں کروٹ پر تین دفعہ سر سے پیر تک اتنا ڈالیں گے کہ نیچے کی جانب یعنی بائیں کروٹ پر پہنچ جائے ۔ پھر دائیں کروٹ پر لٹا کر اسی طرح سر سے پیر تک تین دفعہ اتنا پانی ڈالیں گے کہ نیچے کی جانب یعنی دائیں کروٹ تک پانی پہنچ جائے ۔ 
اُس کے بعد میت کو اپنے بدن سے ٹیک لگاکر ذرا سا بٹھانے کے قریب کرکے اُس کے پیٹ کو اوپر سے نیچے کی طرف آہستہ آہستہ ملیں اور دبائیں گے، اگر کچھ فضلہ خارج ہو تو صرف اُس کو صاف کردیا جائے گا ، وضو اور غسل کو دہرانے کی ضرورت نہیں ، اس لیے کہ اس سے وضو اور غسل میں کوئی نقصان نہیں ہوتا ۔
بس یہاں تک غسل مکمل ہوگیا۔ اُس کے بعد کسی کپڑے سے میت کے بدن کو خشک کرکے اوپر کا گیلا کپڑا بدل دیں گے ، اور جسم پر کافور مل دیں گے۔ پھر اسے کفنایاجائے گا۔
فائدہ: میت کو غسل دینے کے بعد خود بھی غسل کرلینا مستحب ہے ۔
  

2- گواہوں کی موجودگی کے بغیر اگر لڑکا اورلڑکی نکاح کریں گے تو نکاح نہیں ہوگا۔فقط واللہ اعلم