مغرب کا وقت کب ختم ہوتا ہے گھنٹے کے اعتبار سے باحوالہ جواب مرحمت فرمائیں
مغرب کی نماز کا وقت سورج غروب ہوجانے کے بعد سے لے کر آسمان پر جو سرخی ہوتی ہے اس کے ختم ہونے کے بعد کچھ دیر کے لیے سفیدی آتی ہے، اس تک باقی رہتا ہے، اس سفیدی کے غائب ہوجانے کے بعد عشاء کی نماز کا وقت شروع ہوجاتا ہے۔ معتدل ممالک میں یہ وقت کم سے کم ایک گھنٹہ بیس منٹ ہوتاہے۔ اور زیادہ سے زیادہ وقت ایک گھنٹہ پینتیس منٹ ہوتاہے۔ معتدل ایام میں ڈیڑھ گھنٹہ ہوگا، یا ایک گھنٹہ پچیس منٹ ہوگا۔ (سابقہ فتاویٰ جامعہ)
باقی مغرب کی نماز جلدی یعنی سورج غروب ہونے کا یقین ہوجانے کے بعد فوراً پڑھنا افضل ہے، اور بلاعذر اتنی تاخیر کرنا کہ اس وقت میں دو رکعت ادا کی جاسکیں مکروہِ تنزیہی ہے، اور اتنی تاخیر کرنا کہ آسمان پر تارے چمکنا شروع ہوجائیں مکروہِ تحریمی ہے۔ فقط واللہ اعلم
فتوی نمبر : 144110201704
دارالافتاء : جامعہ علوم اسلامیہ علامہ محمد یوسف بنوری ٹاؤن