سوال

ایک مدرسۃ البنات  کی  پرنسپل  صاحبہ وفاق  کی اسناد پر فیس  لیے بغیر دستخط نہیں کرتیں، فی سند 500 لیتی ہیں، اس طرح کل چھ درجات کے 3000 روپے لیتی ہیں، کیا ان کا یہ عمل  شرعاً جائز ہے، حال آں کہ طالبات بذاتِ خود بوقتِ داخلہ وفاق المدارس کو فیس ادا کرتی ہیں؟

جواب

صورتِ  مسئولہ میں مدرسۃ البنات کی مہتممہ کا وفاق کی سند پر دستخط کرنے کی الگ سے فیس لینا جائز نہیں ہے، اس لیے وفاق المدارس کے تحت ہونے والے امتحان میں طلبہ و طالبات سے  فیس وصول کی جاتی ہے، اور وفاق کے ضابطے  کے مطابق  کامیاب ہونے والے طلبہ وطالبات کو سند جاری کی جاتی ہے، اور مذکورہ مدرسہ چوں کہ وفاق سے ملحق ہے،  اس لیے اس کی مہتممہ اس پر دستخط کرنے کی پابند ہیں، نیز مدرسہ کی ذمہ دار ہونے کی حیثیت سے یہ ان کے واجبی کام میں داخل ہے؛ اس لیے اس کی اجرت لینا جائز نہیں ہے۔

الفتاوى الهندية (4/ 411):
"ومنها: أن لايكون العمل المستأجر له فرضاً ولا واجباً على الأجير قبل الإجارة، فإن كان فرضاً أو واجباً قبلها لم يصح". فقط واللہ اعلم