سوال

قضا نماز کو کیسے پڑھایا جائے؟

جواب

1- قضا نمازیں پہلے اپنے  غالب  خیال سے متعین کرلینی چاہییں، اورجتنے سالوں یامہینوں کی نمازیں قضا ہوئی ہیں انہیں تحریرمیں لے آئیں، پھر قضا کرتے وقت یہ نیت کرے کہ سب سے پہلے یا سب سے آخر میں جو  فجر یا ظہر وغیرہ رہ گئی وہ قضا کرتاہوں، اسی طرح پھر دوسری نماز قضا کرتے وقت نیت کرے ۔

اسی طرح ایک دن کی تمام فوت شدہ  نمازیں  ایک وقت میں پڑھ لی جائیں یہ بھی درست ہے۔  نیز  فوت شدہ نمازوں کی ادائیگی کی  ایک آسان صورت یہ بھی ہے کہ ہر  وقتی فرض نماز ( مثلاً وقتی فجر  نماز )  کے ساتھ قضا (فجر )نماز کی نیت سے بھی پڑھ لیاکرے ،جتنے برس یاجتنے مہینوں کی نمازیں قضاہوئی ہیں اتنے سال یامہینوں تک اداکرتارہے۔

واضح رہے کہ پنج وقتہ نمازوں میں صرف فرض نماز کی قضا واجب ہے، اور عشاء کی نماز میں چوں کہ وتر بھی واجب ہیں، اس لیے عشاء کی فرض نماز کے ساتھ وتر کی قضا بھی واجب ہے۔ باقی سننِ مؤکدہ و غیر مؤکدہ اور عیدین کی نمازوں کی قضا نہیں ہے۔ اور جمعہ کی نماز فوت ہوجائے تو اس کی جگہ ظہر کی چار رکعات فرض قضا میں پڑھنا واجب ہوتاہے۔ فقط واللہ اعلم