سوال

جب انسان دنیا سے رخصت ہونے کے قریب ہو تو اس کے پاس کیا پڑھنا چاہیے ؟

جواب

1۔ قریب المرگ شخص کے پاس کلمہ پڑھے۔ 

حضرت ابوسعید اور حضرت ابوہریرہ  رضی اللہ عنہما کہتے ہیں کہ رسول کریم ﷺ نے فرمایا:  " جو لوگ قریب المرگ ہوں انہیں (کلمہ) "لاالہ الا اللہ"  کی تلقین کرو"۔ (مسلم)

تلقین سے مراد قریب المرگ کے رو برو کلمہ "لا الہ الا اللہ" پڑھنا ہے؛ تاکہ وہ بھی سن کر پڑھے، مگر قریب المرگ سے نہ کہا جائے کہ یہ تم بھی پڑھو، مبادا کہ شدتِ مرض یا بدحواسی کے سبب اس کے منہ سے انکار نکل جائے۔

2۔ سورۃ یٰسین کی تلاوت کرے۔

حضرت معقل بن یسار رضی اللہ عنہ راوی ہیں کہ نبی کریم ﷺ نے فرمایا: جو شخص اللہ رب العزت کی رضا و خوشنودی کی طلب میں سورت یٰسین پڑھتا ہے تو اس کے وہ گناہ بخش دیے جاتے ہیں جو اس نے پہلے کیے ہیں؛ لہٰذا اس سورت کو اپنے مردوں کے سامنے پڑھو۔ (بیہقی)فقط واللہ اعلم