میں نے تیس سال قبل اپنے والدین کے ساتھ عمرہ کیا تھا، عمرہ ادا کرنے کے بعد سر کے بال قینچی سے کٹوا لیے تھے، پھر مدینہ منورہ میں پتا چلا کہ دم ضروری ہے، رقم نہ ہونے کی وجہ سے صدقہ دے دیا تھا، اب میرے والدین فوت ہو گئے ہیں، براہِ مہربانی راہ نمائی فرمائیں!
اگرعمرے کے بعد آپ نے اپنے چوتھائی سر کے بال انگلی کے ایک پورے کے بقدر کاٹ لیے تھے تو ایسا کر لینا کافی ہو گیا تھا، اور آپ پر کوئی دم بھی لازم نہیں، لیکن اگر آپ نے مذکورہ مقدار کے بقدر بال نہیں کٹوائے تھے تو ترکِ واجب کی وجہ سے آپ پر دم دینا لازم ہے، دم صرف حدودِ حرم میں دیا جاسکتا ہے، اگر خود نہیں جاسکتے تو حدودِ حرم میں کسی شخص کو کہہ دیں، وہ آپ کی طرف سے وہاں جانور ذبح کردے تو آپ کا دم ادا ہوجائے گا۔ فقط واللہ اعلم
فتوی نمبر : 143908200980
دارالافتاء : جامعہ علوم اسلامیہ علامہ محمد یوسف بنوری ٹاؤن