سوال

میری آٹو پارٹس کی دکان ہے اور میری دکان پر کم و بیش 200 آئٹم ہیں، اور کچھ آئٹم میں ڈبوں پر کارٹون کی تصویر ہے، جیسے چھوٹا بچہ سے مشابہت کرتی ہوئی تصویر، اس صورت میں میرے لیے کیا حکم ہے؟

جواب

صورتِ  مسئولہ میں اگر جان دار کی تصاویر پر مشتمل کمپنیوں کے ڈبوں والے آئٹم کا معیاری متبادل کے طور پر کسی دوسری کمپنی سے وہی آئٹم مل جائے جس کے ڈبوں پر جان دار کی تصاویر نہ ہوں تو آپ اس کو ترجیح دیں اور اگر ایسا نہ ہوسکے تو ایسی صورت میں ایسے ڈبوں کو دکان میں اس طور پر ترتیب سے رکھیں کہ وہ تصاویر چھپ جائیں۔

نیز  چوں کہ مقصد ڈبے کے اندر کا آئٹم ہے نہ کہ جان دار کی تصویر، اس لیے ایسی اشیاء کو فروخت کرنے سے ملنے والی آمدنی حلال ہوگی۔ تاہم اگر جان دار کی تصویر ہونے یا نہ ہونے کی وجہ سے اس آئٹم کی قیمت میں فرق ہو تو جتنی رقم تصویر ہونے کی وجہ سے ملے گی، وہ ناجائز ہوگی اور اس کا بغیر ثواب کی نیت کے صدقہ کرنا لازم ہوگا۔ 

کفایت المفتی میں ہے :

’’اس میں چوں کہ تصویر کی بیع و شرا مقصود نہیں ہوتی؛ اس لیے ضرورۃً گنجائش ہے‘‘۔ (۹ / ۲۴۲، دار الاشاعت) فقط واللہ اعلم