سوال

ہم دفتر میں نماز پڑھتے ہیں، ایک کمرے کو ہم نے نماز کے لیے مختص کر دیا ہے، اب اس کمرے میں تقریباً  تین صفیں بچھی ہوئی ہیں نماز کی، جماعت کے ساتھ نماز ہوتی ہے تین وقت کی، ظہر عصر مغرب، اب جن حضرات کی نماز رہ جاتی ہے وہ اپنی جماعت کرواتے ہیں، کیا یہ جماعت کروانا درست ہے؟ اور اگر درست ہے تو کیا اسی مصلے پر کھڑے ہو کر جماعت کروائی جاسکتی ہے جس پر پہلے جماعت کرائی گئی تھی؟

جواب

واضح رہے کہ جماعتِ ثانیہ کی کراہت کا حکم مسجدِ شرعی کے لیے ہے، لیکن اگر کوئی جگہ ایسی ہے جو باقاعدہ مسجد نہیں اور وہاں کے لیے کوئی امام و مؤذن مقرر نہیں تو ایسی جگہ ایک جماعت ہو جانے کے بعد دوسری جماعت کرانا مکروہ نہیں ہے؛ لہذا جن لوگوں کی جماعت رہ جائے وہ دوبارہ اُسی جگہ دوبارہ جماعت کروا کے با جماعت نماز پڑھ سکتے ہیں۔

الدر المختار شرح تنوير الأبصار وجامع البحار (ص: 76):
"ويكره تكرار الجماعة بأذان وإقامة في مسجد محلة لا في مسجد طريق أو مسجد لا إمام له ولا مؤذن". 

اور اس صورت میں بہتر یہ ہے کہ بعد میں جماعت کرانے والے بھی جماعت سے پہلے اقامت کہیں۔

الفتاوى الهندية (1/ 55):
" مسجد ليس له مؤذن وإمام معلوم يصلي فيه الناس فوجاً فوجاً بجماعة فالأفضل أن يصلي كل فريق بأذان وإقامة على حدة. كذا في فتاوى قاضي خان في فصل المسجد". فقط واللہ اعلم