سوال

میں ایک پرائیویٹ سیکٹر میں کام کرتا ہوں،  نماز کے لیے ٹائم نکالنا بہت مشکل ہے،  کیا اکیلے فرض پڑھ لینا ٹھیک ہے یا نہیں؟

جواب

آپ کے افسر پر لازم ہے کہ آپ کو نماز  کے لیے مسجد جاکر باجماعت ادا کرنے کی اجازت دے، آپ بھی اس کی کوشش کریں، جب تک یہ ممکن نہ ہو پائے، دفتر ہی میں چند لوگ مل کر جماعت کرالیا کریں۔ اور اگر ذمہ داران کی طرف سے جماعت میں شرکت پر پابندی یا سختی نہیں ہے، آپ کی سستی یا کام کی کثرت کی وجہ سے جماعت چھوٹ رہی ہے تو یہ غفلت مناسب نہیں ہے، جماعت سے نماز پڑھنا مردوں کے لیے سنتِ مؤکدہ ہے جو حکم کے اعتبار سے واجب کے قریب ہے، یعنی بلاعذرِ شرعی جماعت چھوڑنے پر گناہ ہوتا ہے۔ ذیل میں جماعت کی اہمیت پر صرف ایک روایت تحریر کی جارہی ہے، ایسی بے شمار احادیث میں جماعت سے نماز ادا کرنے کی تاکید اور چھوڑنے پر وعید بیان کی گئی ہے۔

"عن ابن عباس رضي اللّٰه عنہما قال: قال رسول اللّٰه صلی اللّٰه علیه وسلم: من سمع المنادي فلم یمنعه من اتباعه عذر، قالوا: وما العذر؟ قال: خوف أو مرض، لم تقبل منه الصلاة التي صلّی". (سنن أبي داؤد ۱/۸۱)

یعنی حدیثِ مبارک  میں ہے کہ جو شخص مؤذن کی آواز سنے اور بلا کسی عذر کے نماز کو نہ جائے تو اس کی نماز اللہ تعالی کی بارگاہ میں قبول نہیں ہوتی ، پوچھا گیا ، عذر سے مراد کیا ہے؟  فرمایا:  کوئی بیماری یا کوئی خوف۔ فقط واللہ اعلم