سوال میں آپ نے جس حدیث کے متعلق دریافت کیا ہے، یہ حدیث "سنن ابن ماجه"ودیگر کتبِ احادیث میں موجود ہے، "سنن ابن ماجه"کی مذکورہ حدیث کا ترجمہ درج ذیل ہے:

’’ حضرت  علی رضی اللہ عنہ سے روایت ہے کہ رسول صلی اللہ علیہ  وسلم نے ارشاد فرمایا:جب نصف شعبان کی رات ہو تو  اس رات کو عبادت کرو اور دن كوروزہ رکھو؛ اس لیے کہ اُس رات میں اللہ تعالی غروبِ شمس سے طلوعِ فجر تک آسمانِ دنیا پر نزول فرماتے ہیں اور اعلان فرماتے  ہیں :ہے کوئی مغفرت کا طلب گار کہ میں اس کی مغفرت کروں!  ہے کوئی روزی کا طلب گار  کہ میں اس کو روزی دوں! ہے کوئی مصیبت زدہ کہ میں اس کو عافیت دوں  ! ہے کوئی ایسا! ہے کوئی ایسا!(یوں اللہ تعالی مختلف اعلانات فرماتے ہیں) یہاں تک کہ فجر طلوع ہو جاتی ہے‘‘۔

(سنن ابن ماجه، أبواب إقامة الصلوات والسنة فيها، باب ما جاء في ليلة النصف من شعبان، ج:2، ص:399، رقم:1388، ط:دار الرسالة العالمية)

اگرچہ مذکورہ حدیث  کی سند پر کلام کیا گیا ہے، لیکن   بہت سے محققین کے نزدیک  یہ حدیث    قابلِ عمل  ہے۔محدثِ کبیر حضرت مولانا حبیب الرحمن اعظمی رحمہ اللہ لکھتے ہیں:

’’پندرہویں شعبان کے روزے کے بارے میں جوحدیث ’’ابنِ ماجہ‘‘ میں آئی ہے،وہ ’’موضوع‘‘ نہیں ہے،کسی ماہرِ حدیث عالم نے اس کو’’ موضوع ‘‘نہیں کہا ہے ۔۔۔ اِس حدیث کے راویوں میں ’’ابوبکر بن ابی سبرہ‘‘ ضرور ہے ، اُس کی نسبت بے شک یہ کہاجاتاہے کہ وہ حدیثیں بناتا تھا، لیکن اُس سے یہ ثابت نہیں ہوتا کہ زیرِبحث حدیث اُس کی بنائی ہوئی اور ’’موضوع‘‘ ہے، محض اس بناپر کہ سند میں کوئی ایسا راوی موجود ہے، اُس سے تو بس اِتنا لازم آئے گاکہ حدیث سنداً ضعیف ہے۔یہی وجہ ہے کہ جن حضرات نے’’ سنن ابنِ ماجہ‘‘ کی’’ موضوع‘‘ احادیث کی نشان دہی کی ہے، اُن میں اِن احادیث کا ذکر نہیں ملتا۔"ماتمسّ إليه الحاجة" (از مولانا محمد عبدالرشید نعمانی رحمہ اللہ)  میں وہ ساری حدیثیں مذکور ہیں ، جس کا جی چاہے دیکھ لے۔اصولِ حدیث وغیرہ کی مختلف کتابوں میں جگہ جگہ یہ تصریح مل سکتی ہےکہ کسی حدیث کی سند میں کوئی کذاب یاوضّاع راوی پایا جائے، تو محض اتنے سے وہ حدیث موضوع نہیں ہوجائے گی،جب تک کہ دوسری کوئی دلیل اس کے موضوع ہونے پر دلالت نہ کرے۔مثال کے طور پر  (فتح المغیث:۱/۲۵۱ )  ملاحظہ کیا جائے، امام بخاریؒ لکھتے ہیں:

"هذا مع أنّ مجرد تفرّد الكذّاب بل الوضّاع، ولو كان بعد الاستقصاء في التفتيش مِن حافظٍ متبحّرٍ تامِّ الاستقراء غير مُستلزمٍ لذلك، بل لا بدّ معه مِن انضمام شيءٍ مما سيأتي". ۔۔۔

سطورِ بالا سے یہ بات واضح ہوگئی کہ جس شخص نے یہ بات کہی ہے کہ روایتِ فضیلت ِصومِ شعبان میں ابوبکر بن عبد اللہ راوی’’ واضع الحدیث ‘‘تھا، اس لیے یہ روایت’’ موضوع ‘‘ٹھہری ،بالکل غلط ہے‘‘۔ 

(تفصیل کے لیے ملاحظہ فرمائیے:  مقالات ابوالمآثر، جلد دوم ، پندرہویں شعبان کی حدیث ،ص:۷۸۔۸۲، دار الثقافۃ الاسلامیۃ، مئو،یوپی۲۰۱۴ء) 

فقط واللہ اعلم