سوال

اگر حالتِ حیض میں شوہر کے چھونے سے یا کھیلنے سے عورت کو انزال ہو جائے شہوت کے ساتھ بغیر جماع کے تو کیا یہ گناہ ہے؟

جواب

حالتِ حیض میں بیوی سے جماع کرنا یا  ناف سے لے کر گھٹنے تک کے حصہ میں بغیر حائل کے لطف اندوز ہونا حرام اور ناجائز ہے، لہذا صورتِ مسئولہ میں  اگر ناف سے لے کر گھٹنے تک کے درمیان بغیر حائل کے یا ایسے باریک کپڑے کے ہوتے ہوئے کھیل کود یا چھونے سے انزال ہوا ہے جس کپڑے سے حرارت محسوس ہورہی تھی تو گناہ کے مرتکب ہوئے۔ اس پر توبہ و استغفار کرنا اور حسبِ توفیق صدقہ دینا چاہیے۔

ہاں البتہ جماع کے علاوہ استمتاع (یعنی بوس وکنار، اس کے بدن کو ناف سے لے کر گھٹنے تک کے علاوہ جسم کے حصے میں چھونے یا کھیلنے کودنے، یا ناف سے لے کر گھٹنے کے درمیانی حصے میں اتنا موٹا کپڑا باندھ یا پہن کر شرم گاہ میں دخول کے بغیر نفع اندوز ہونا جس کپڑے سے جانبین کے جسم کی حرارت بالکل محسوس نہ ہو) کی اجازت ہے، البتہ اگر جماع کی نوبت آنے کااندیشہ ہوتو احتیاط بہتر ہے۔

(فتاویٰ ہندیہ،الفصل الرابع فی احکام الحیض والنفاس ،2/57)

فقط واللہ اعلم