ہمارے علاقے میں رواج ہے کہ جب کوئی شخص فوت ہو جائے تو مسجد میں پہلے اس طرح اعلان کیا جاتا ہے کہ فلاں شخص فوت ہوگیا ہے اور اس کی نماز جنازہ کا اعلان بعد میں کیا جائے گا۔ پھر دو یا تین گھنٹہ کے بعد نمازِ جنازہ کے وقت کا اعلان دوبارہ کروایا جاتا ہے۔ کیا شرعی لحاظ سے اس طرح کرنا جائز ہے یا نہیں کہ مسجد میں پہلے صرف فوتگی کی اطلاع کا اعلان اور بعد ازاں نمازِ جنازہ کے وقت کا اعلان کیا جائے ؟
مسجد میں میت یا جنازہ کا اعلان جائزہے، رسول اللہ ﷺ نے نجاشی (شاہِ حبشہ) کی موت کا اعلان مسجد میں کیاتھا، اسی طرح ’’غزوۂ موتہ‘‘ کے امراء کی شہادت کی اطلاع دی، اس وقت آپ ﷺ مسجد میں منبر پر تشریف فرماتھے۔
ذکره العیني في شرح البخاري ص ۲۲ جلد ۴:
واقدی سے ص: ۲۵ پرمروی ہے: ’’أنه علیه السلام كان علی المنبر حينما أخبر عن موت أمراء موتة‘‘.فقط واللہ اعلم
فتوی نمبر : 144105200392
دارالافتاء : جامعہ علوم اسلامیہ علامہ محمد یوسف بنوری ٹاؤن