سوال

3 افراد نے مل کر ایک کمرہ کرائے پر لینے  کے لیے مالک کو 12500 کی رقم دینی تھی، اس طرح ہر ایک فرد کے حصے میں 4,166 روپے آتے تھے، ان میں سے 2 افراد نے اول کو کہا کہ ہمارے پاس ابھی رقم نہیں ہے  تم ایڈوانس کی جتنی رقم ادا کرسکتے ہو ادا کردو تو اول نے 5000 ایڈوانس کی مد میں مالک کو ادا کردیے، لیکن پورا مہینہ گزرگیا  وہ دو افراد ایڈوانس کی رقم ادا نہیں کر سکے جس کے نتیجے میں مالک مکان نے وہ رقم ضبط کرلی، اب سوال یہ ہے کہ اول نے ان میں سے ایک شخص سے موبائل 3500 میں خریدا تھا، جس میں سے 2666اس نے ادا کردیے اور باقی 834 روپے اس ایڈوانس کی مد میں کٹوتی کروالیے. لیکن اب جب رقم مالک نے ضبط کرلی تو بقیہ 834 روپے کا ادا کرنا اول پر لازم ہوگا کہ نہیں؟ 

جواب

ذکر کردہ معاملہ میں جب اجارہ کا عقد پایہ تکمیل تک نہیں پہنچا  اور معاملہ ختم ہوگیا تو ایسی صورت میں مالکِ  مکان کے ذمہ اس رقم کا واپس لوٹانا ضروری ہے جو ایڈوانس کی مد میں وصول کی ہے،اس رقم کا استعمال شرعاً  اس کے  لیے جائز نہیں، البتہ اگر  مالکِ  مکان وہ رقم واپس نہیں کرتا تو ایسی صورت میں  اول نے جو  رقم موبائل کی قیمت سے منہا کی تھی (834 روپے) اس کا واپس لوٹانا ضروری نہیں جب کہ اس (موبائل بیچنے والے)نے  خوشی سے ایڈوانس کی رقم میں شامل کردیے تھے ۔

مجمع الأنهر في شرح ملتقى الأبحر (2/ 230):
"لأن المقر أقر أن لا حق له عليها فيؤخذ بإقراره". فقط واللہ اعلم