سوال

تبلیغی حضرات بدھ کے دن گشت کرتے ہیں اور مسجد میں جن اعمال کو صحابہ کرامؓ اور حضرت محمدﷺ  کے ساتھ خاص کرتے ہیں تو شریعت میں ان کی حقیقت کیا ہے؟ ذرا  تفصیل سے سمجھائیں؛ کیوں کہ ہم نے تو آج تک نہ اپنے استادوں سے سنا ہے اور نہ کہی کسی کتاب کے مطالعے میں پڑھا ہے کہ صحابہ کرامؓ کا معمول بعینہ ایسا تھا جیسا کہ تبلیغ والے ان کی طرف راجع کرتے ہیں؟

جواب

ہماری معلومات کے مطابق تبلیغی جماعت سے وابستہ حضرات یہ دعویٰ نہیں کرتے کہ جیسے ہم لوگ بدھ کے دن گشت کرتے ہیں یا فضائلِ اعمال کی تعلیم اور دیگر معمولات کرتے ہیں بعینہ اسی طرح رسول اللہ ﷺ  کا اور صحابہ کا بھی عمل تھا۔ اگر کوئی شخص اس طرح کا دعویٰ کرتا ہے تو یہ درست نہیں، اور اس کی نسبت اکابر و ذمہ دارانِ تبلیغ کی طرف کرنا بھی درست نہیں ہے۔ البتہ ایک دوسرے کو  نیکی کا کہنا اور برائی سے منع کرنا،  مساجد میں ذکر اور دین کا علم سیکھنے اور سکھانے کے حلقہ قائم کرنا  اور امت کی ہدایت اور انہیں دعوت دینے کے لیے بازاروں میں جاکر دعوت دینا، گھروں سے نکل کر اس کی کوشش کرنا وغیرہ اعمال، رسول اللہ ﷺ اور صحابہ کرام رضی اللہ عنہم کی سیرت سے ثابت ہیں، اور تبلیغ والے بھی اسی حد تک اس کی نسبت رسول اللہ ﷺ اور صحابۂ کرام رضی اللہ عنہم کی طرف کرتے ہیں۔ فقط واللہ اعلم