سوال

میں نے ایک شخص کو بتایاکہ سواری پر سوار ہوتے وقت "بسم اللہ مجریھا ومرسھا "پڑھوں، اس نے مجھےکہا کہ یہ تو کشتی کی دعا ہے، میں نے جواب دیا کہ ہمارے لیے کشتی ہی ہے ،کیا میں نے اس کو درست بتایا ؟

جواب

صورتِ مسئولہ میں "بسم اللّٰھ مجریھا ومرسھا "دعا کشتی کے ساتھ ساتھ دوسری  سواری پر سوار ہوتے ہوئے بھی پڑھی جاسکتی ہے، البتہ کشتی کے علاوہ دیگر سواری کےلیے عموماً  "سُبْحَانَ الَّذِي سَخَّرَ لَنَا هَذَا وَمَا كُنَّا لَهُ مُقْرِنِينَ وَإِنَّا إِلَى رَبِّنَا لَمُنْقَلِبُون"کے الفاظ کےساتھ دعا منقول ہے۔

معارف القرآن میں ہے:

"آیت میں کشتی اور سواری پر سوار ہونے کے آداب کی تعلیم ہے کہ "بسم اللہ مجریھا ومرسھا " کہہ کر سوار ہوں ۔"

(معارف القرآن ازمولانا مفتی شفیع رحمہ اللہ ،ج:4،ص:625،ط:معارف )

وفیہ ایضاً:

"یہ سواری پر بیٹھ کر پڑھنے کی دعاہے ،چنانچہ آنحضرت صلی اللہ علیہ وسلم سے متعدد روایات میں منقول ہے کہ آپ صلی اللہ علیہ وسلم سواری پر بیٹھتے وقت یہ کلمات پڑھاکرتے تھے ۔"

(معارف القرآن از مولانامفتی محمد شفیع رحمہ اللہ ،ج:10 ، ص:723،ط:معارف )

فقط واللہ اعلم