سوال

1. اعتکاف کے دوران میرے شوہر نے مجھ سے ہم بستری کی اور میں پہلی بار اعتکاف میں بیٹھی تھی، میں نے اعتکاف کرنے سے پہلے جتنا بھی پڑھا تھا، اس میں اس کا ذکر نہیں تھا اور میرے دل میں تھا کہ شوہر کو منع کرنا گناہ ہے، اللہ پاک ناراض ہوتے ہیں تو اس ڈر سے میں روک نہیں سکی، اور میرے علم میں بھی نہیں تھا، پھر میں نے آپ کے سوالات میں پڑھا کہ ہم بستری سے اعتکاف فاسد ہو جاتا ہے، میں نے اللہ پاک سے بہت توبہ اور استغفار کی، اب میرے لیے کیا حکم ہے؟

2. اعتکاف میں ویکس اور فیشیل کروا سکتے ہیں؟

جواب

1. اعتکاف میں ہم بستری کرنے سے اعتکاف فاسد ہو جاتا ہے،  اور مسنون اعتکاف فاسد ہونے کی صور ت میں ایک دن کے اعتکاف کی قضا روزے کے ساتھ لازم ہو جاتی ہے، لہذا آپ پر لازم ہے کہ آپ قضا اعتکاف کی نیت سے کسی دن سورج غروب ہونے سے پہلے اعتکاف کی مقرر جگہ میں داخل ہوجائیں اور اگلی صبح روزہ کھیں اور روزہ افطار کرکے سورج غروب ہونے کے بعد اعتکاف کی جگہ سے باہر نکلیں۔

2. اگر اعتکاف میں  اپنی جگہ پر ہی مذکورہ کام کیے جائیں تو اس سے اعتکاف فاسد نہیں ہو گا،  اور اگر اعتکاف کی جگہ سے باہر نکل کرویکس اور فیشیل کرائے گی تو اعتکاف فاسد ہو جائے گا۔

واضح رہے کہ عورت کے لیے دوسری عورت سے ستر چھپانا فرض ہے، لہٰذا غیر ضروری بالوں کی صفائی کے لیے دوسری عورت سے بھی ویکس کرانا جائز نہیں ہے۔ فقط واللہ اعلم