سوال

اگرایک باپ نے اپنی  زندگی میں اپنا سارا مال  اپنے  ایک بیٹےکے نام کردیا تومرنے کے  بعد باقی ورثاء اس کے ساتھ مال میں شریک ہوں  گے یا نہیں؟ شریعت کی  رو  سےباپ کا یہ عمل کیسا ہے؟

جواب

والد کا اپنی زندگی میں اپنی جائیداد اولاد کو دینا ہبہ  کہلاتا ہے اور ہبہ کے بارے میں شریعتِ مقدسہ کی ہدایت یہ ہے کہ ہبہ کرنے میں تمام اولاد ( بیٹے اور بیٹیوں ) کے درمیان برابری کی جائے، ساری جائیداد کسی ایک بیٹے کو دے کر دوسری اولاد کو محروم کرنا گناہ کا کام ہے،  لیکن اگر والد نے اپنی حیات میں اپنا سارا مال کسی ایک بیٹے کے نام کر کے اس کو قبضہ و تصرف بھی دے دیا تو وہ بیٹا اس کا مالک بن جائے گا اور دیگر ورثاء کا اس میں کوئی حصہ نہیں ہو گا۔

 اور  اگر والد نے محض کاغذات میں جائیداد    بیٹے کے نام کی ہو،  قبضہ و تصرف نہ دیا ہو تو ایسی صورت میں  وہ بیٹا اس کا مالک متصور نہیں ہو گا اور  والد کے انتقال کی صورت میں جائیداد میں تمام اولاد کا حصہ ہو گا۔

فتاویٰ عالمگیری میں ہے:

"لايثبت الملك للموهوب له إلا بالقبض هو المختار، هكذا في الفصول العمادية".

(4/378،  الباب الثانی فیما یجوز من الهبة و ما لایجوز، ط: رشیدیه)

فقط واللہ اعلم