سوال

زید کی بیوی نے جھگڑے کے دوران زید کو تین پتھر دئے کہ مجھے طلاق دو ،زید نے ایک پتھر دیا اور کہا تجھے طلاق ،دوسرا پتھر دیا اور کہا کہ تجھے طلاق ،پھر تیسرا پتھر دیا اور پھر طلاق کہنے میں زید  کو   غالب گمان ہے کہ طلاق کہا ہے ،لیکن بیوی کہتی ہے کہ تیسری دفعہ نہیں کہا ہے۔

جواب

صورت مسئولہ میں  اگر  شوہر کو  تیسری دفعہ  پتھر دینے کی صورت میں   غالب گمان یہی  ہے کہ  طلاق کا لفظ ادا كيا ہے تو ایسی  صورت میں  شوہر کے غالب گمان کا اعتبار کرتے ہوئے زید کی بیوی پر مجموعی اعتبار سے  تینوں طلاقیں واقع ہو گئيں ،نکاح ختم ہو گیا ، اب رجوع اور مزید   ساتھ رہنے کی گنجائش نہیں ہے اور دوبارہ نکاح بھی نہیں ہو سکتاہے،مطلقہ اپنی عدت(پوری تین ماہواریاں اگر حاملہ نہ ہو،اگر حاملہ ہو تو وضع حمل تک )گزار کر دوسری جگہ نکاح کرسکتی ہے، ہاں اگر مطلقہ اپنی عدت گذار کر کسی دوسرے شخص کے ساتھ نکاح کرے اور اس سے جسمانی تعلق (صحبت )ہو جائے ،اس کے بعد دوسرا شوہر اسے طلاق دیدے یا بیوی طلاق لے لے یااس  کا انتقال ہو جائے تو اس کی عدت گذار کر اپنے پہلے شوہر سے نکاح کر سکتی ہے ۔