سوال

وضو کرنے کے بعد اگر پیشاب کا قطرہ نکل آئے یا ایسا شک ہو جائے تو وضو دوبارہ کرنا ہو گا یا ضرورت نہیں؟

جواب

صورتِ مسئولہ میں وضو کرنے کے بعد اگر قطرے نکلنے کا یقین یا ظنِ غالب ہو تو ا س صورت میں وضو ٹوٹ جائےگا، اور دوبارہ وضو کرنا پڑےگا، اور اگر صرف شک ہو کہ قطرے نکل آئے ہیں  یا نہیں ؟تو اس صورت میں دیکھ لے کہ واقعۃً صرف شک ہی ہےتو ا س صورت میں وضو نہیں ٹوٹےگا ،تاہم شک کی صورت میں ایک دو بار دیکھ لینے کے بعد اگر یقین ہوجائے کہ قطرہ نہیں نکلتا تو اب شک پر توجہ نہ دے، اس طرح کےشک کے زائل كرنے کےلیے علاج یہ ہے کہ وضو سے فارغ ہو کر اپنا ہاتھ تر کر کے مذکورہ حصے پر چھینٹے  مار لیا کریں۔

فتاوی ہندیہ میں ہے:

"منها ما يخرج ‌من ‌السبيلين من البول والغائط والريح الخارجة من الدبر والودي والمذي والمني والدودة والحصاة، الغائط يوجب الوضوء قل أو كثر وكذلك البول والريح الخارجة من الدبر."

(کتاب الطھارۃ، الفصل الخامس فی نواقض الوضوء ، ج:1، ص:9،ط: رشیدیہ)

فتاوی شامی میں ہے:

"فإن ‌الشك والاحتمال لا يوجب الحكم بالنقض، إذ اليقين لا يزول بالشك."

(کتاب الطھارۃ، سنن الوضوء، ج:1، ص148، ط:سعید)

فقط واللہ اعلم