سوال

 نماز وتر کا بہترین طریقہ کیا ہے ؟ نماز وتر 3 رکعت 2 سلاموں کے ساتھ ادا کی جا سکتی ہے ؟ یا 3 رکعت ایک ہی سلام کے ساتھ ادا کی جائے ؟ نیز تیسری رکعت میں سورہ فاتحہ اور سورت کے بعد تکبیر کہنا اور پھر دعائے قنوت پڑھنا درست ہے یا بغیر تکبیر کہے نماز ادا کی جائے؟

جواب

احناف کے نزدیک وتر کی نماز  تین رکعت ایک سلام کے  ساتھ  پڑھنا ضروری ہے، اس کے دلائل احادیثِ  مبارکہ کی روشنی میں کتابوں میں موجود  ہیں؛ اس لیے حنفی مقلد کے لیے دو سلام کے ساتھ  وتر پڑھنا درست نہیں ہے،  اس سے وتر ادا نہیں ہوں گے۔

نیز تیسری رکعت میں تکبیر کہی جائے گی، اُس کے بعد  کوئی دعا پڑھنا بھی ضروری ہے، اور قنوت کی مشہور دعا پڑھنا بہترہے۔

النهر الفائق شرح كنز الدقائق (1/ 291):

"(وهو ثلاث ركعات بتسليمة) حتى لو اقتدى فيه بمن يسلم على رأس الركعتين فسلم فسد اقتداؤه."

فقط واللہ اعلم