میری والدہ کو فوت ہوئے تقریبا ساڑھے پانچ سال ہوگئے ہیں، ان کے نام ایک پلاٹ تھا،جو ہماری والدہ نے بچوں کی نیت سے رکھا ہوا تھا اور والدہ کا ارادہ تھا کہ جب بھی ترقیاتی کام ہوگا تو اس پر گھر بنائیں گے (والدہ کا اس پلاٹ کو فروخت کرنے کا بالکل ارادہ نہیں تھا) ، لیکن والدہ کے انتقال کے بعد ، ابتداء ہی سے ہم سب ورثاء کا یہی ارادہ اور نظریہ ہے کہ جب بھی اس پلاٹ کی اچھی قیمت ملی گی ، ہم اسے سیل کردیں گے(بیچ دیں گے)۔
اس پانچ سال کے عرصہ میں ہم نے یہ پلاٹ والدہ کے نام سے اپنے نام نہیں کروایا تھا ،اور اب پانچ سال بعد ہم نے اپنے نا م کروالیا ہے۔
سوال یہ ہے کہ اس پلاٹ پر زکات کب سے لازم ہوگی؟ ہمارے نام پر ہونے کے بعد سے؟ یا جب سے والدہ کا انتقال ہوا ہے تب سے؟ ہمیں صرف اس سال کی زکات ادا کرنی ہوگی؟ یا پچھلے پانچ سالو ں کی بھی ادا کرنی ہوگی؟
صورتِ مسئولہ میں سائل کی والدہ کے متروکہ پلاٹ میں ورثاء پر زکات دینا واجب نہیں ۔
بدائع الصنائع میں ہے:
"ووجوب الزكاة وظيفة الملك المطلق وعلى هذا يخرج قول أبي حنيفة في الدين الذي وجب للإنسان لا بدلا عن شيء رأسا كالميراث بالدين والوصية بالدين، أو وجب بدلا عما ليس بمال أصلا كالمهر للمرأة على الزوج، وبدل الخلع للزوج على المرأة، والصلح عن دم العمد أنه لا تجب الزكاة فيه".
(کتاب الزکاة، فصل شرائط فرضية الزكاة، ج:2، ص:10، ط:دار الكتب العلمية)
فقط واللہ اعلم
فتوی نمبر : 144411100634
دارالافتاء : جامعہ علوم اسلامیہ علامہ محمد یوسف بنوری ٹاؤن
