سوال

 میری شادی کو ایک سال ہوگیا ہے،  لیکن کوئي اولاد نہیں ہے، اس کے  لیے کوئي  وظیفہ  بتا دیں!

جواب

حکیم الامت  حضرت مولانا اشرف علی تھانوی  رحمہ اللہ نے اعمال ِ قرآنی میں لکھا ہے:

اولاد کے لیے دعا:﴿رَبِّ هَبْ لِي مِن لَّدُنْكَ ذُرِّيَّةً طَيِّبَةً إِنَّكَ سَمِيعُ الدُّعَاء﴾(آل عمران:38)

خاصیت:  جس کو اولاد سے مایوسی ہو،وہ اس آیت کو پڑھاکرے،خداوندِ کریم اس کی برکت سے فرزندِ صالح عطافرمائے گا ان شاء اللہ۔

(اعمالِ قرآنی، ص:30،ط: دارالاشاعت،اردو بازار ،کراچی)

مولانا محمد یوسف لدھیانوی شہید رحمۃ اللہ علیہ ایسے ہی سوال کے جواب میں تحریر فرماتے ہیں:

40 عدد لونگ لیں ،ہر لونگ پر سات مرتبہ سورۃ النور کی آیت نمبر :40جو"أو كظلمات "سے شروع ہو کر "فماله من نور"پر ختم ہوتی ہے،پڑھیں۔جب عورت ماہواری سے فارغ ہو تو رات کو سوتے وقت ایک لونگ چباکر کھالیا کرے،اوپر سے پانی نہ پیے،متواتر چالیس دن تک بلا ناغہ کھائے،اور اس دوران میاں بیوی کبھی کبھی مل لیا کریں ،اللہ تعالی کو منظور ہوگا تو اولاد ہوجائے گی۔

(آپ کے مسائل اور اُن کا حل، ج:4، ص:252،اورادو وط: مکتبہ لدھیانوی)

فقط واللہ اعلم