ایک بار عمرہ کرنے کے لیے مدینہ منورہ کی چالیس نماز لازمی ہے؟
مدینہ منورہ (مسجد نبوی) میں چالیس نمازیں پڑھنا یہ عمرہ کا حصہ نہیں، لہذا اگر مدینہ منورہ (مسجد نبوی) میں چالیس نمازیں پڑھنے کی نوبت نہ آئے تو پھر بھی عمرہ درست ہے، عمرہ پر کوئی اثر نہیں پڑے گا۔ البتہ چالیس نمازیں مسجد نبوی میں ادا کرنے کی فضیلت احادیث مبارکہ سے ثابت ہے، جناب نبی کریم صلی اللہ علیہ وسلم نے فرمایا کہ جس شخص نے میری مسجد(مسجد نبوی)میں چالیس نمازیں اس طرح پڑھیں کہ (درمیان میں)کوئی نماز فوت نہ ہو تو اس کے لیے آگ سے براءت،اور عذاب سے نجات لکھ دی جاتی ہے اور وہ نفاق سے بری ہوجاتا ہے۔ اس لئے عمرہ یا حج کے سفر میں اس فضیلت کو بھی حاصل کرنے کی کوشش کرنی چاہئے۔
"عن أنس بن مالك عن النبي صلى الله عليه وسلم أنه قال من صلى في مسجدي أربعين صلاة لا يفوته صلاة كتبت له براءة من النار ونجاة من العذاب وبرئ من النفاق".
أخرجه الإمام أحمد في مسنده في مسند أنس بن مالك (20/ 40) برقم (12583)، ط. مؤسسة الرسالة، الطبعة الأولى:1421 هـ = 2001 م)
فقط والله أعلم
فتوی نمبر : 144405101442
دارالافتاء : جامعہ علوم اسلامیہ علامہ محمد یوسف بنوری ٹاؤن