سوال

جدہ میں بسلسلۂ روزگار مقیم ہوں، عمرہ کیا،ليكن بال کٹوانا بھول گیا، اور جدہ واپس آکر احرام کھول دیا ،اب شرعی مسئلہ کیا ہے؟ مکہ سے واپس آئے ایک روز گزر چکا ہے۔

جواب

واضح رہے کہ عمرہ کے ارکان ادا کرنے کے بعد احرام کھولنے کے ليے حلق یا قصر ضروری ہے، بغیر حلق یا قصر کے محض احرام کی چادریں کھولنے سے اور سلے ہوئے کپڑے وغیرہ پہننے کی وجہ سے احرام کھولنا شمار نہیں ہوگا، البتہ مذکورہ افعال ممنوعات احرام کی وجہ سے جنایت شمار ہوں گی، جس کی وجہ سے دم لازم ہوگا۔

صورتِ مسئولہ میں سائل فی الحال بھی احرام میں ہے یعنی حلق یا قصر نہیں کیا ہے(جیسے کہ سوال سے بھی یہی ظاہر ہورہا ہے) تو مکہ مکرمہ جاکر حدودِ حرم میں حلق یا قصر کرائے،  باقی اگر قصر سے پہلے یعنی حالتِ احرام میں ممنوعاتِ احرام(مثلاًسلے ہوئے کپڑے پہننا یا خوشبو وغیرہ لگانا یا دیگر خلافِ احرام امور) کا ارتکاب کیا ہےتو اس  کی وجہ سے ہر جنایت پر ایک دم ضرور لازم ہوگا،جن کی تفصیل تحریر کرکےاس کے مطابق حکم معلوم کیا جاسکتا ہے۔

اسی طرح سائل اگر جدہ ہی میں حلق یا قصر کرتا ہے، تو حدودِ حرم کے علاوہ میں حلق یا قصر کرنے کی وجہ سے بھی دم لازم ہوگا۔

بدائع الصنائع في ترتيب الشرائع میں ہے:

"أن الحلق أو التقصير، واجب لما ذكرنا فلا يقع التحلل إلا بأحدهما و لم يوجد فكان إحرامه باقيا فإذا غسل رأسه بالخطمي فقد أزال التفث في حال قيام الإحرام فيلزمه الدم، والله أعلم".

(کتاب الحج، فصل الحلق أو التقصير، ج:2، ص:140، ط: دار الکتب العلمية)

الفتاویٰ التاتارخانیہ میں ہے:

"وفي حق المعتمر لایختص بالزمان أو المکان بلاخلاف و في الهدایة : و التقصیر و الحلق في العمرة غیر مؤقتة بالزمان بالإجماع فإن لم یقصر حتی رجع و قصر فلاشیئ علیه في قولهم جمیعاً".

(کتاب الحج، في الحلق والقصر، ج:2، ص:544، ط: إدارۃ القرآن)