سوال

لوگوں کو ادھار دینا ٹھیک ہے یا غلط؟  جو شخص اُدھار لے کر جائے اور وقت پر پیسے واپس نہ دے، اس بارے میں راہ نمائی فرمائیں۔

جواب

واضح رہے کہ قرض اتارنے  کی قدرت ہونے کے باوجود قرض اتارنے میں ٹال مٹول کرنا  ظلم ہے، اور ایسے شخص کو رسولِ اکرم صلی اللہ علیہ وسلم کے فرمان کی رو سے شرعاً ظالم کہا جائے گا، نیز  استطاعت کے باوجود اگر کوئی قرض نہ اتارے تو اندیشہ ہے کہ کہیں اُس وعید  کا مستحق نہ بن جائے جس کے مطابق مقروض شہید بھی ہوجائے تو قرض کے وبال سے اسے خلاصی نہیں ملے گی، جب کہ شہید کے تمام گناہ معاف کردیے جاتے ہیں، یہی وجہ تھی کہ رسولِ اکرم صلی اللہ علیہ وسلم کی خدمت میں جب کوئی جنازہ لایا جاتا تو آپ صلی اللہ علیہ وسلم دریافت فرماتے کہ اس پر قرض تو نہیں ہے؟ اگر میت مقروض نہ ہوتی تو رسولِ اکرم صلی اللہ علیہ وسلم جنازہ پڑھاتے اور اگرمیت مقروض ہوتی اور اپنے پیچھے قرض کی ادائیگی کا انتظام نہ چھوڑا ہوتا اور کوئی اس کے قرض کی ضمانت بھی نہ لیتا تو صحابہ سے کہہ دیتے کہ اپنے بھائی کا جنازہ ادا کرلو، اور آپ  صلی اللہ علیہ وسلم ایسے افراد کی نمازِ جنازہ ادا نہ فرماتے؛ تاکہ امت کو قرض میں ٹال مٹول کی برائی اور اس کی شدت کا احساس ہو۔

صورتِ مسئولہ میں  اگر کوئی شخص ضرورت مند ہے اور قر ض کا مطالبہ کررہاہو تو ایسے شخص کو قرض دینا مستحسن ہے، تاکہ وہ اس سے اپنی جائز ضروریات پوری کرسکے،  اوراگر قرض دینے والے نے قرض کی واپسی کے لیے کوئی وقت مقرر کیا ہو، تو ایسی صورت میں مقروض کے لیے ضروری ہےکہ وہ قرض کی رقم کو وقت  ِمقر ر پر واپس کرنے کو یقینی بنائے، استطاعت ہونے کے باوجود ٹال مٹول کرنا  ظلم اور گناہ ہے ، اور  ٹال مٹول کرنے کی صورت میں احادیث میں وارد شدہ وعید کا مصداق  بننے کاخدشہ ہے۔

بخاری شریف میں ہے:

"حدثنا ‌مسدد: حدثنا ‌عبد الأعلى، عن ‌معمر، عن ‌همام بن منبه، أخي وهب بن منبه: أنه سمع ‌أبا هريرة رضي الله عنه يقول: قال رسول الله صلى الله عليه وسلم:  مطل ‌الغني ظلم."

(كتاب في الاستقراض، باب مطل الغني ظلم، ج:3، ص: 118، ط: السلطانية)