سوال

1- اگر کوئی شخص سہوًا بحالتِ  جنابت فرض نماز اور تراویح پڑھالے تو اس کا کیا حکم ہے؟  یعنی اب تراویح اور فرض دو نوں کی قضاکر لے؟

2- کسی حافظ نے سپیڈ سےپچھلے سال تراویح پڑھائی ہے تو کیا ان تراویح کا لو ٹانا لازم ہو گا یا نہیں؟  یعنی قرآن کریم تیزی سے پڑھا ہے ان تراویح میں تو اس کا کیا حکم ہے ؟

جواب

1-  کوئی شخص تراویح ادا نہ کرسکا یا بحالتِ  جنابت ادا کی  تو وقت ختم ہوجانے کے بعد اب تراویح کی قضا نہیں ہے۔ (کفایت المفتی 3/404،دارالاشاعت)

البتہ بحالتِ  جنابت ادا کی گئی فرض نماز کی  قضا لازم ہے۔ اور امام نے حالتِ جنابت میں امامت کرائی تو جیسے اس پر اپنی نماز کی قضا لازم ہوگی، اسی طرح اسے مقتدیوں میں اعلان بھی کرنا چاہیے؛ تاکہ جن مقتدیوں نے وہ نماز اس کی اقتدا میں پڑھی ہے، وہ دہرالیں۔

2- اتنی تیز رفتار سے  قرآن ِ  کریم پڑھنا کہ کچھ سمجھ نہ آئے ، جائز نہیں، ایسی صورت میں توبہ و استغفار لازم ہے۔  البتہ  پچھلے سال کی ایسی   تراویح کو دہرانا یا قضا کرنا  لازم نہیں۔ فقط واللہ اعلم