سوال

میرے چچا میرے سسر بھی ہیں  تو کیا میں سسرال والے گھر کو اپنا دوسرا گھر بول سکتا ہوں؟

ایسا سنا ہے کہ اللہ نے مرد کے شادی کے بعد دو گھر بنائے ہیں،  ایک اس کے اپنے والدین کا گھر اور دوسرا اس کے سسرال کا گھر۔  (واضح رہے کہ جائیداد کی نسبت سے بات نہیں کر رہا۔)

جواب

قرآنِ مجید میں اللہ تعالیٰ نے سسرالی رشتے کو منجملہ اپنی نعمتوں میں شمار فرمایا ہے، ارشادِ مبارک ہے:

وَهُوَ الَّذِي خَلَقَ مِنَ الْمَاءِ بَشَرًا فَجَعَلَهُ نَسَبًا وَصِهْرًا ۗ وَكَانَ رَبُّكَ قَدِيرًا[الفرقان:54]

ترجمہ: "اور وہ ایسا ہے جس نے پانی سے (یعنی نطفہ سے) آدمی کو پیدا کیا، پھر اس کو خاندان والا اور سسرال والا بنایا، اور (اے مخاطب) تیرا پروردگار بڑی قدرت والا ہے۔ " (بیان القرآن للتھانوی)

تاہم  یہ الفاظ کہ "اللہ نے مرد کے شادی کے بعد دو گھر بنائے ہیں،  ایک اس کے اپنے والدین کا گھر اور دوسرا اس کے سسرال کا گھر" قرآن مجید میں بھی نہیں  ہیں، اور   احادیث کی کتب میں  بھی ایسی کوئی روایت نظروں سے نہیں گزری۔

باقی اگر کوئی شخص سسرال کو اپنا دوسرا گھر بولتا ہے تو شرعاً ممنوع بھی نہیں۔ لیکن اسے محض اپنا گھر بولنے سے کہنے والے اور اس کی بیوی کا وطنِ اَصلی نہیں بنے گا، یعنی اگر کہنے والے کا سسرال اس کے اپنے وطن سے مسافتِ سفر پر واقع ہے  تو سسرال میں پندرہ دن سے کم قیام کی صورت میں چار رکعات والی فرض نمازوں میں قصر کرنی ہوگی۔ 

فقط واللہ اعلم