سوال

پہلا سوال یہ ہے کہ اگر طلاقِ ثلاثہ کی تحریر  پر شوہر ایک دستخط کر دے تو کیا طلاق ثلاثہ واقع ہوجائے گی ؟،عموماً وکیل طلاق ثلاثہ کے لیے تین دفعہ دستخط کرواتے ہیں۔ 

دوسرا سوال یہ ہے کیا تین طلاق دینے کے لیے تین دفعہ زبان سے کہنا ضروری ہے؟

جواب

واضح رہے کہ  جس طرح طلاق کا لفظ بولنے سے طلاق واقع ہوجاتی ہے اسی طرح لکھنے سے اور لکھے ہوئے پر دستخط کرنے سے بھی طلاق واقع ہوجاتی ہے،لہٰذا صورتِ مسئولہ میں :

1۔دستخط کرنے والے کو اگر معلوم ہو  کہ تحریر میں تین طلاقیں لکھی ہوئی ہیں اور اس نے آخر میں ایک دستخط بھی کردیا  تو تینوں طلاقیں واقع ہو جائیں گی،ہر طلاق کے لیے الگ الگ دستخط ضروری نہیں ہے۔

2۔اسی طرح تین طلاقیں دینے کے لیے تین دفعہ زبان سے  کہنا بھی ضروری نہیں ہے، بلکہ  ایک دفعہ  تین طلاق کہنے سے بھی تین طلاقیں واقع ہو جاتی ہیں۔

فتاوی شامی میں ہے:

"و لو استكتب من آخر كتابًا بطلاقها و قرأه على الزوج فأخذه الزوج و ختمه و عنونه و بعث به إليها فأتاها وقع إن أقر الزوج أنه كتابه."

(مطلب في الطلاق بالكتابة، 246/3،ط: ایچ ایم سعید)

و فیه أیضاً:

"(و البدعي ثلاثة متفرقة) و كذا بكلمة واحدة بالأولى."

(كتاب الطلاق، 232/3،ط: ایچ ایم سعید)

فقط واللہ اعلم