سوال

میری 2011 میں  شادی ہوئی، ڈیڑھ سال بعد میں نے ان الفاظ سے ایک طلاق دی : ”میں تمہیں طلاق دیتا ہوں “، اس کے بعد میری بیوی ایک سال کے لیے اپنے والدین کے گھر چلی گئی، پھر دوبارہ ہمارے یہاں آئی، تقریباً ڈیڑھ سال کا عرصہ گزارا، اس کے بعد پھر اپنے والدین کے یہاں چلی گئی اور تقریبا 4 سال بعد واپس آئی، پھر ہم ساتھ رہنا شروع ہوگئے۔

طلاق کا مذکورہ جملہ کہنے کے بعد میری اپنی بیوی سے کوئی بات، رابطہ اور ملاقات نہیں ہوئی، جب پہلی مرتبہ جب ایک سال بعد ہمارے یہاں آئی تو  (بغیر نکاح کے) ہم ساتھ رہنا شروع ہوگئے،  ہم نے تعلقات بھی قائم کیے جس کے نتیجہ میں اولاد بھی ہوئی۔ 

سوال یہ ہے کہ طلاق ہوئی ہے یا نہیں ؟

اگر ہوگئی ہے تو اب ہم دوبارہ ایک ساتھ رہ سکتے ہیں ؟

جواب

صورتِ مسئولہ میں جب آپ نے ایک مرتبہ  اپنی بیوی سے یہ جملہ کہا کہ ”میں نے تمہیں طلاق دی“، اس جملہ سے آپ کی بیوی پر ایک طلاقِ رجعی واقع ہوگئی تھی، جس کے بعد دورانِ عدت (مکمل تین ماہ واریاں اگر حمل نہ ہو اور حمل کی صورت میں بچہ کی پیدائش تک) آپ کو رجوع کرنے کا اختیار تھا،لیکن  اگر اس مدت میں آپ نے  قولی یا فعلی رجوع نہیں کیا جیسا کہ سوال میں درج ہے، تو عدت کے گزرنے سے  نکاح ختم ہوچکا تھا،دونوں ایک دوسرے کے لیے اجنبی بن چکے تھےاور دونوں کا ساتھ رہنا جائز نہیں تھا۔ البتہ عدت کے گزرنے کے بعد آپ کو نئے مہر کے ساتھ گواہوں کی موجودگی میں تجدید نکاح کی اجازت تھی۔طلاق کے ایک سال کے بعد دونوں کا بغیر نکاح کیے ملنا اور تعلقات قائم کرنا ،ناجائز تھا،  جس پر دونوں کو سچے دل سے ندامت کے ساتھ توبہ و استغفار کرنالازم ہے، البتہ اس تعلق سے پیدا ہونے والے بچہ کا نسب سائل سے ثابت ہوگا۔

اب دوبارہ ساتھ رہنے کے لیے ضروری ہے کہ گواہوں کے رُوبرو نئے مہر کے ساتھ نکاح کی تجدید کی جائے، نیز تجدیدِ نکاح کے بعد آئندہ کے لیے آپ کو  صرف دو طلاقوں  کا حق حاصل ہوگا۔ 

مبسوط سرخسی میں ہے:

"(قال)، وإذا طلقها واحدة في الطهر أو في الحيض أو بعد الجماع فهو يملك الرجعة مادام في العدة لأن النبي صلى الله عليه وسلم «طلق سودة - رضي الله تعالى عنها - بقوله اعتدي ثم راجعها» «وطلق حفصة رضي الله عنها ثم راجعها بالوطء» ويستوي إن طالت مدة العدة أو قصرت لأن النكاح بينهما باق ما بقيت العدة وقد روي أن علقمة رضي الله عنه طلق امرأته فارتفع حيضها سبعة عشر شهرا ثم ماتت فورثه ابن مسعود رضي الله عنه منها وقال إن الله تعالى حبس ميراثها عليك فإذا ‌انقضت ‌العدة قبل الرجعة فقد بطل حق الرجعة وبانت المرأة منه، وهو خاطب من الخطاب يتزوجها برضاها إن اتفقا على ذلك."

(كتاب الطلاق، باب الرجعة، ج:6، ص:19، دار المعرفة)

و فیه أیضاً:

"ولو تزوجها قبل التزوج أو قبل إصابة الزوج الثاني كانت عنده بما بقي من التطليقات".

(کتاب الطلاق، ج:6، ص: 95، ط: دارالمعرفة)