سوال

میرے شوہر کا انتقال ہوچکا ہے ، اور میری کوئی اولاد نہیں ہے ، میرے شوہر کی پہلی بیوی سے ایک بیٹا اور دو بیٹیاں ہیں ، میرے چار بھائی اور چار بہنیں ہیں اور ایک سوتیلی بہن ہے ، جو کہ میرے والد مرحوم کی پہلی بیوی سے ہے ۔ 

میرا آپ سے سوال یہ ہے کہ شوہر کے انتقال کے بعد مجھے ورثہ ملا ہے ، کیا میں اس میں سے اپنے سوتیلے بیٹے کے لیے کچھ وصیت کرسکتی ہوں ؟ اس کے علاوہ دینی مدارس کے لیے بھی کچھ وصیت کرنا چاہتی ہوں ،  برائے مہربانی مجھے بتائیں کہ میں شرعی طور سے کس طرح اپنے سوتیلے بیٹے اور دینی مدارس کے لیے وصیت کرسکتی ہوں۔

وضاحت : شوہر کی پہلی بیوی کا شوہر کی زندگی میں انتقال ہو گیا تھا ۔

جواب

صورتِ مسئولہ میں سائلہ اپنے کل مال کی تہائی میں سے سوتیلے بیٹے اور اسی طرح دینی  مدارس اور دیگر خیر کے کاموں کے لیے وصیت کرسکتی ہے ، اس بات کا خیال رہے کہ وصیت کل مال  کے تہائی سے زائد نہ ہو، کیونکہ تہائی مال سے زائد وصیت ورثاء کی اجازت پر موقوف ہوتی ہے ۔

تبیین الحقائق شرح کنز الدقائق میں ہے :

"ثم ‌تصح ‌الوصية للأجنبي بالثلث من غير إجازة الوارث ولا تجوز بما زاد على الثلث."

(كتاب الوصايا ج : 6 ص : 182 ط : دارالكتاب الاسلامي)

فقط والله اعلم