سوال

میرا سوال یہ ہے کہ سافٹ ویئرز کے" کریک ورژن" استعمال کرنا شریعت کی رو سے کیسا ہے؟ خصوصاً "کورل ڈرا" اور "فوٹوشاپ" جس سے بہت سارے لوگ دینی کام بھی کرتے ہیں،  اشتہار اور کتب ڈیزائننگ وغیرہ،  براہ کرم تفصیلی جواب عنایت فرمائیں ۔

جواب

صورتِ مسئولہ اگر مذکورہ سافٹ وئیر  بنانے والی کمپنیوں کی طرف سے ان سافٹ وئیرز کو کاپی کرنے کی اجازت نہیں ہے اور قانونا بھی ایسا کرنا جرم ہے تو ایسی صورت میں ان سافٹ وئیر کے کریکڈ ورژن  کے استعمال سے اجتناب کرنا چاہیے، تاکہ قانون کی خلاف ورزی کی وجہ سے کوئی تکلیف نہ ہو، خود کو خطرے اور تہمت کے مواقع سے بچانا شریعت کی تعلیمات میں سے ہے۔تاہم اگر کسی کے پاس ایسا سوفٹ ویئر موجود ہو  یا  اس نے خریدا ہو تو اس کے استعمال کی گنجائش ہوگی۔

یہ  واضح رہے کہ  جاندار کی تصاویر پر مشتمل ویڈیو بنانا یا اس  کی ایڈیٹنگ کرنا جائز نہیں ہے، البتہ  اگرویڈ یو  غیر جان دار کی ہو اور اس میں موسیقی یا اور کوئی شرعی خرابی نہ ہو تو اس کی  ویڈیو ایڈیٹنگ کرنا جائز ہے۔

مجلۃ الاحکام  العدلیة میں ہے:

’’کل یتصرف في ملکه کیفما شاء، لکن إذا تعلق حق الغیر به فیمنع المالك من تصرفه علی وجه الاستقلال.‘‘

(الباب الثالث، الفصل الأول في بيان بعض قواعد أحكام الأملاك، ج:1،ص:230، ط:نور محمد كتب خانه)

فقط واللہ أعلم