سوال

اسمگلنگ کرنا کیسا ہے؟ میرا مطلب اگر میں آٹا پاکستان سے اسمگلنگ کرکےافغانستان لے جاؤں تو کیسا ہے؟ 

جواب

 تجارت کے حلال ہونے کے لیے ضروری ہے کہ اس میں شرعی اصولوں او رشرائط کا خیال رکھا جائے ،لہذا کسی بھی  دوسرے  ملک سے مال خرید کر اپنے ملک لانایا  اپنے  ملک سے کوئی  چیز  وہاں جاکر  بیچنا ،اس  میں اگر  خرید و فروخت کی تمام شرائط کا لحاظ رکھاجائے گا  تو  یہ فی نفسہ مباح ہوگا، لیکن جب عوام الناس کے مفاد  کی خاطر حکومتی سطح پر جائز اشیاء  کی اسمگلنگ ممنوع ہو تو  اس سے اجتناب  ضروری ہے؛ کیوں کہ کسی بھی ریاست میں رہنے والا شخص اس ریاست میں رائج قوانین پر عمل درآمد کا (خاموش)  معاہدہ کرتاہے، اور جائز امور میں معاہدہ کرنے کے بعد اسے پورا کرنا دیانتًا  ضروری ہوتاہے،   اس طرح  کے جائز  امور   سے متعلق قانون کی خلاف ورزی گویا معاہدہ کی خلاف ورزی ہے، اور معاہدے کی خلاف ورزی سے شریعت نے منع کیا ہے، نیز قانون شکنی کی صورت میں  مال اور عزت کا خطرہ رہتا ہے، اور پکڑے جانے کی صورت میں  مالی نقصان کے ساتھ ساتھ سزا ملنے کا بھی اندیشہ ہوتا ہے،  اور اپنے آپ کو ذلت  کے مواقع سے بچانا شرعاً ضروری ہے،  لہذا  اسمگلنگ سے اجتناب کرنا چاہیے۔البتہ  جائز اشیاء   کی اسمگلنگ سے جو  نفع  حاصل  ہو گا ، وہ حرام نہیں ہو گا۔فقط واللہ اعلم