سوال

ایک شخص رقم دیتا ہے دوسرے کو اور رقم دینے والا رقم لینے والے کا مکان وغیرہ استعمال کرتا ہے ،اس کو عرفا "سکیورٹی" پر مکان وغیرہ لینا دینا کہا جاتا ہے شرعا یہ ناجائز ہے بغیر عوض کے مکان وغیرہ استعمال کرنے کی وجہ سے جو کہ سود میں شامل ہے اور اس صورت میں سکیورٹی پر لینے والے کے ذمے مثلی کرایہ لازم ہوگا، جس کا ادا کرنا اس پر لازم ہے،اور غور طلب امر یہ ہے کہ جو رقم مکان مالک کو دی گئی تھی جس کو عرفًا" سکیورٹی کی رقم"کہا جاتا ہے حالانکہ وہ قرض" ہے شرعاً ابھی وہ رقم سکیورٹی پر دینے والے کے قبضے میں ہے اور اس معاملے کو 2 یا اس سے زیادہ مہینے ہوچکے  تو اس دوران جو مثلی کرایہ لازم ہوا ،اگر وہ سکیورٹی پر دینے والا معاف کردے اپنی خوشی سے ،تو کیا اب بھی سکیورٹی پر لینے والے کے ذمے اس مثلی کرایہ کا ادا کرنا لازم ہے؟

جواب

واضح رہے کہ مکان کرائے پر لیتے وقت   جو سکیورٹی  (زر ضمانت) مالک مکان کو ادا کی جاتی ہے یہ تو شرعا  ابتداء رہن ہوتی ہے اور استعمال کی اجازت ہونے کی وجہ سے قرض کے حکم میں ہوتی ہے ۔ رہائشی مکان کے بدلہ سکیورٹی (زر ضمانت)  کی تین ممکنہ صورتیں ہیں :

۱) مارکیٹ ریٹ کے مطابق مکان کرائے پر لیا جائے اور مالک مکان کے پاس سکیورٹی جمع کروائی جائے۔

۲) مالک مکان کو معروف سکیورٹی سے کچھ زیادہ سکیورٹی جمع کروائی جائے اور اس زیادہ سکیورٹی کی وجہ سے مارکیٹ ریٹ کے حساب سے کم کرایا طے کیا جائے۔

۳) مالک مکان کو سکیورٹی جمع کروائی جائے اور کسی قسم کا کرایہ  طے نہ کیا جائے بلکہ اس سکیورٹی کے عوض رہائش پر مکان مل جائے۔

ان تین صورتوں میں سے پہلی صورت جائز ہے باقی دونوں صورتیں  نا جائز ہیں کیوں کہ اخیر کی دونوں صورتوں میں سکیورٹی جو کہ قرض ہے اس کے بدلہ نفع کا حاصل کرنا پایا جارہا ہے (دوسری صورت میں یہ نفع کرائے میں کمی کی شکل میں ہے اور تیسری صورت میں بغیر کرائے کے مکان میں رہائش کی شکل میں ہے) اور قرض کے بدلہ نفع حاصل کرنا سود کے حکم میں ہے۔

لہذا صورت مسئولہ میں  سکیورٹی ادا  کر کے  بلا اجرت مکان رہائش  کے لیے لینا شرعًا نا جائز ہے چاہے مالک مکان خوشی سے  کرایہ  معاف کرے ،نیز  جن ایام میں مکان میں رہائش اختیار کی ان ایام کی  اجرت مکان میں رہنے والے پر اجرت مثل کے اعتبار سے واجب ہوگی کہ وہ مالک مکان کو اس  جیسے مکان کا کرایہ ادا کرے خواہ علیحدہ سے رقم دے کر کرایہ دے یا ایسی سکیورٹی والی رقم میں سے منہا کر کے دے۔

فتاوی شامی میں ہے:

"وفي الأشباه كل قرض جر نفعا حرام فكره للمرتهن سكنى المرهونة بإذن الراهن".

(قوله كل قرض جر نفعا حرام) أي إذا كان مشروطا كما علم مما نقله عن البحر، وعن الخلاصة وفي الذخيرة وإن لم يكن النفع مشروطا في القرض، فعلى قول الكرخي لا بأس به ويأتي تمامه."

(کتاب البیوع ، باب المرابحہ وا لتولیۃ، 166/5، سعید)

فتاوی ہندیہ  میں ہے:

"(أما تفسيرها شرعا) فهي عقد على المنافع بعوض، كذا في الهداية. (وأما) (ركنها) فالإيجاب والقبول بالألفاظ الموضوعة في عقد الإجارة."

(کتاب الاجارہ ،409/4،سعید)

بدائع الصنائع في ترتيب الشرائع میں ہے:

"وأما الإجارة ‌الفاسدة، وهي التي فاتها شرط من شروط الصحة فحكمها الأصلي هو ثبوت الملك للمؤاجر في أجر المثل لا في المسمى بمقابلة استيفاء المنافع المملوكة ملكا فاسدا؛ لأن المؤاجر لم يرض باستيفاء المنافع إلا ببدل."

(کتاب الاجارۃ، فصل فی حکم الاجارۃ، 208/4، دار الکتب العلمیۃ)

فقط واللہ اعلم