سوال

ایک شخص نے اپنی بیوی سے یہ کہا تھا کہ: "اگر تم اپنے میکے شادی کی تقریب میں شامل ہوئی تو تمہیں طلاق ہے"، پھر اس کے میکے والے دھوکہ سے اسے اس تقریب میں لے گئے، لیکن یہ نہیں جانتی تھی کہ یہ وہی تقریب ہے جس سے اسے منع کیا گیا تھا اور اس کا کہنا ہے کہ اسے مولود کی تقریب بتائی گئی تھی تو آیا ایسی صورت طلاق واقع ہو گئی  ہے یا نہیں؟

جواب

صورتِ مسئولہ میں مذکورہ شخص کی بیوی پر اپنے میکے شادی کی تقریب میں جانے کی وجہ سے ایک طلاقِ رجعی واقع ہوگئی ہے، شوہر کو بیوی کی عدت (پوری تین ماہواریاں اگر حمل نہیں ہے، اگر حمل ہے تو بچہ کی پیدائش تک) میں رجوع کا حق حاصل ہے، عدت گزرنے کے باوجود رجوع نہیں کیا تو عدت گزرتے ہی دونوں کا نکاح ختم ہوجائے گا اور عورت کے لیے دوسری جگہ نکاح کرنا جائز ہوگا، پھر اگر دونوں ساتھ رہنا چاہتے ہوں تو نئے مہر کے ساتھ تجدیدِ نکاح کرکے ساتھ رہ سکتے ہیں۔

فتاوی ہندیہ میں ہے:

"وإذا أضافه إلى الشرط ‌وقع ‌عقيب الشرط اتفاقا."

(ج:1، ص:420، كتاب الطلاق، الباب الرابع، الفصل الثالث، ط:رشيدية)

وایضاً:

"وإذا طلق الرجل امرأته تطليقة رجعية أو تطليقتين، فله أن يراجعها في عدتها رضيت بذلك أو لم ترض، كذا في الهداية."

(ج:1، ص:470، کتاب الطلاق، الباب السادس في الرجعة، ط:رشيدية)

فقط والله أعلم