سوال

میرا سوال یہ ہے کہ ہم اپنے پیر صاحب کے وظائف کے علاوہ کسی اور بزرگ یا عالم کے بتائے ہوئے وظائف پڑھ سکتے ہیں؟ 

جواب

جو ادعیہ یا تسبیحات احادیث سے ماثورہ ہیں اور جن مواقع پر پڑھنا ثابت ہے، ان کے لیے کسی شیخ ومرشد سے اجازت کی ضرورت نہیں، ان کو آپ ثابت شدہ مواقع پر خود پڑھ سکتے ہیں، البتہ جو اوراد ووظائف شیخ اپنے مرید کی اصلاح وتزکیہ کے لیے حسب احوال تلقین کرتے ہیں، ان اوراد کا وظیفہ اپنے شیخ ومرشد کی اجازت سے کرنا چاہیے، اور کمیت وکیفیت میں شیخ کی ہدایت پر عمل کرنا چاہیے۔شیخ کے علاوہ کسی کے وظائف پڑھنے میں شرعاً  کوئی پابندی نہیں، البتہ کسی اور کے وظائف کرنے سے پہلے شیخ کے علم لے آئیں اور اجازت لے لیں تو بہتر ہے۔

فقط واللہ اعلم