سوال

 ہمارا ددھیال والوں سے تعلق مختصر رہا ہے ، ان کی طرف سے بےتکلفی نہ ہونے کی وجہ سے ہم ان سے کال پر بات نہیں کرتے ہیں البتہ جب ممکن ہو توعیادت و ملاقات کر لیتے ہیں،  کال پر بات نہ کرنا کیسی رنجش کی وجہ نہیں بلکہ بےتکلفی نہ ہونے کی وجہ سے ہے،  حال ہی میں ہم نے صلہ رحمی کی تفصیلات پڑھی تو ہمیں خیال ہوا کہ ہمیں ان سے کال پر بات کرنی چاہیے مگر اب صورتحال کچھ یوں ہے کہ والدہ کو ان کی طرف سے کوئی تکلیف پہونچی ہے،  جس سےوہ بہت متاثر ہوئی ہیں،  ایسے میں اگر ہم ان سے کال پر بات کریں گے تو والدہ کی ذہنی حالت پر اثر پڑے گا ،  کیا اگر ہم والد سے ان کی حال خبر لے لیں اور ددھیال والوں کے لیے خیر و بھلائی کی دعائیں کرتے رہیں تو ہم قطع رحمی کے گناہ سے محفوظ رہیں گے ؟رہمائی فرمائیں۔

جواب

صورتِ مسئولہ میں متعلقین اور رشتہ داروں کے غم اور خوشی کی مناسبت سے ان کی خبرگیری کرنے سے بھی صلہ رحمی کا حق ادا ہوجاتا ہے، صلہ رحمی کے لئے ہر وقت کال پر بات کرنا ضروری نہیں ہے، لہذا جب سائل مذکورہ رشتہ داروں کے بارے میں خبرگیری کرتا ہے، اور ان کے غم اور خوشی میں شریک ہوتا ہےتووہ رشتہ داری کا حق اداکرنے کی وجہ سے عنداللہ ماخوذ نہیں ہے۔تاہم والد اور دادا دادی عظیم محسنین میں سے ہیں، ان کی عزت اور احترام اور رضا کا ہمیشہ لحاظ رکھنا اور ان کی خبر گیری کرتے رہنا چاہیے۔