سوال

ایک اسکول استاد کے تقرر کے وقت اس بات کا معاہدہ کرتا ہے کہ استاد کی ماہانہ تنخواہ سے دس فیصد رقم ادارہ اس وقت تک کاٹے گا جب تک ایک ماہ کی تنخواہ مکمل نہیں ہو جاتی اور وہ رقم (ایک ماہ کی تنخواہ) سکیورٹی ڈپازٹ کے نام سے اپنے پاس رکھے گا اور استاد کو اس بات کا پابند کرتا ہے کہ وہ جب بھی اسکول چھوڑ کر جائے گا ادارے کو ایک ماہ پہلے آگاہ کرے گا۔ اور اگر استاد ایک دو دن پہلے بتا کر چلا جاتا ہے، تو وہ سکیورٹی ڈپازٹ کا حقدار نہیں ہوگا۔ چونکہ ادارے کو استاد کے فوری جانے سے نقصان اور پریشانی کا سامنا کرنا پڑتا ہے کہ فوراً دوسرا استاد ملنا ممکن نہیں ہوتا اور بچوں کا بھی حرج ہوتا ہے۔ پوچھنا یہ ہے کہ:

1۔ کیا استاد کا فوری چھوڑ کر جانا جائز ہے؟

 2۔ اگر استاد ایک یا دو دن پہلے بتا کر چلا جاتا ہے تو کیا ادراہ اس کا سکیورٹی ڈپازٹ ادا کرنے کا پابند ہے؟

جواب

1)صورت مسئولہ میں اسکول کے استاذ کے لیے جائز نہیں کہ اطلاع کیے بغیر  اسکول چھوڑ کر جائے ،ایسا کرنا وعدہ خلافی ہے جو سخت گناہ ہے۔

2)واضح رہے کہ شریعت میں کسی بھی قسم کے مالی جرمانہ لینے کی اجازت نہیں ہے، لہذا صورت مسئولہ میں اگرکوئی استاذ کسی عذر کی بناء پر   ایک دو دن پہلے چلا جاتا ہے،تو اگرچہ اس استاذ نے وعدہ خلافی کی ہے،لیکن اسکول کی انتظامیہ کے لیے سیکیورٹی ڈپازٹ کی رقم کو بطورِ جرمانہ ضبط کرنا شرعا ناجائز نہیں ہے۔

فتاوی شامی میں ہے:

''وفي شرح الآثار : التعزير بالمال كان في ابتداء الإسلام ثم نسخ .والحاصل أن المذهب عدم التعزير بأخذ المال''۔

(باب التعزر، ج:4، ص:61، ط:سعید)

فقط واللہ اعلم