سوال

اگر سالی کے ساتھ کسی نے زنا کیا تو اس کابیوی سے نکاح ختم ہوجاتاہے یانہیں ؟

جواب

زنا کبیرہ گناہوں میں سے ہے خواہ کسی کے  ساتھ ہو، لہٰذا سالی کے ساتھ زنا بھی کبیرہ گناہ ہے جس پر فوری طور پر توبہ و استغفار کرنا لازم ہے، نیز سالی اور بہنوئی اور اس طرح کے وہ رشتے جن میں پردہ نہ کرنے کی وجہ سے گناہ میں واقع ہونے کا امکان رہتاہے، ان سے زیادہ اہتمام کے ساتھ پردہ کرنا واجب ہے، رسول اللہ ﷺ نے دیور وغیرہ سے پردے کی تاکید کرتے ہوئے اسے موت سے تشبیہ دی ہے۔ تاہم سالی سے زنا کی وجہ سے بیوی سے نکاح ختم  نہیں ہوگا،لیکن آئندہ  مذکورہ شخص  کو اپنی سالی سے پردہ کرنا ضروری ہوگا، اور سالی سے تعلق کے بعد جب تک اسے ایک مرتبہ ایام نہ آجائیں بیوی سے قربت کی اجازت نہیں ہوگی۔

الدر المختار وحاشية ابن عابدين (رد المحتار) (3 / 34):

"و في الدراية عن الكامل: لو زنى بإحدى الأختين لايقرب الأخرى حتى تحيض الأخرى حيضةً، و استشكله في الفتح، و وجهه أنه لا اعتبار لماء الزاني، و لذا لو زنت امرأةً رجل لم تحرم عليه و جاز له وطؤها عقب الزنا. اهـ."

فقط واللہ اعلم