سوال

 ہمارا جزیرہ روڈریگس RODRIGUES جو کہ موریشس کے  ماتحت میں ہے،  ہمارا ایک ہی وقت ہے، موریشس کی حکومت ایک ہی ہے اور کرنسی ایک  ہے،  دوری موریشس سے 617 کلو میٹر ہے،  روڈریگس کا عرض 20کلو میٹر ہے، روڈریگس کا طول 8  کلو میٹر موریشس کا طول 60 کلو میٹر موریشس کا عرض 40 کلو میٹر ہے۔ رورڈریگس میں طلوع موریشس سے 23  منٹ قبل ہوتاہے، روڈریگس میں عید  کی  چھٹی موریشس کے ہلال پر مدار ہے،  کیا حنفی فقہ کے اعتبار سے روڈریگس اور موریشس ایک ہی ہلال پر رمضان اور عید کر سکتے  ہیں؟

جواب

بلادِ  قریبہ میں اختلافِ  مطالع معتبر ہونے یا نہ ہونے میں فقہاء کا اختلاف ہے۔(۱)  البتہ بلادِ  بعیدہ میں اختلافِ  مطالع معتبر ہونے پر ابنِ رشد نے اجماع نقل کیا ہے۔  ( ۲) اب بلادِ  بعیدہ کی تعیین میں اقوال مختلف ہیں، علامہ شامی نے لکھا ہے کہ :بعض فقہاء فرماتےہیں کہ: ایک مہینہ کی مسافت پر مطلع بدل جاتا ہے، اور فقہاء کی تصریحات کے مطابق تین دن کا سفر 48 میل بنتا ہے تو اس کے حساب سے چارسواسی میل کی مسافت پر مطلع تبدیل ہوگا۔ دوسرا قول یہ لکھا ہے کہ: چوبیس فرسخ پر مطلع بدل جائے گا۔ (۳) اور معارف السنن میں حضرت بنوری رحمہ اللہ نے لکھا ہے کہ ہر پانچ سو میل کی مسافت پر مطلع بدل جاتا ہے۔ (۴) 

لہذا مذکورہ صورت میں جب کہ  مسافت 500 میل  یا 480 میل  سے کم ہی ہے تو  دونوں علاقے ایک ہی ہلال پر عید کریں گے۔ فقط واللہ اعلم

حوالہ جات:

• 1: _شامی، ج: ۲، ص: ۳۹۳ 
• 2:_ بدائع، ج: ۲، ص: ۸۳،  بحر، ج: ۲، ص: ۲۶۷ تا ۲۷۰، معارف السنن ، ج: ۵، ص: ۳۳۷
• 3:_شامی ، کتاب الصوم، ج: ۲، ص: ۳۹۳
• 4:_ج: ۵، ص: ۴۴۰