۲۔ ملا علی قاری رحمہ  اللہ"مرقاة المفاتيح شرح مشكاة المصابيح"میں مذکورہ روایت کی تشریح میں لکھتے ہیں:

"(لَوْ كانتِ الدُّنيا تَعْدِلُ) : بِفتحِ التاءِ وكسرِ الدّالِ، أيْ: تَزِنُ وتُساوِيْ (عندَ اللهِ جناحَ بعوضةٍ) أيْ: ريشةُ ناموسةٍ، وهُو مثلٌ لِلقِلّةِ والحقارةِ، وَالمعنَى أنّه لَوْ كانَ لَها أدنَى قدرٍ (مَا سقَى كافِراً) أي: مِنْ مِياهِ الدّنيا ( شَرْبَةَ ماءٍ) أيْ: يمنعُ الكافرَ مِنْها أدنَى تمتُّعٍ، فإنّ الكافرِ عدوُّ اللهِ، والعدوُّ لا يُعطَي شيئاً ممّا له قدرٌ عندَ المُعْطِيْ. فمِنْ حَقارتِها عندَه لا يُعطِيها لِأَوليائِه، كما أشار إليه حديثُ: "إنّ اللهَ يَحْمِيْ عبدَه المُؤْمنَ عنِ الدّنيا، كما يَحْمِيْ أحدُكم المريضَ عنِ الماءِ" ...  ومِنْ دناءتِها لَديهِ أنْ يُكْثِرها على الكفّارِ والفجّارِ، بَلْ قالَ تَعالَى: {وَلَوْلَا أَنْ يَكُونَ النَّاسُ أُمَّةً وَاحِدَةً لَجَعَلْنَا لِمَنْ يَكْفُرُ بِالرَّحْمَنِ لِبُيُوتِهِمْ سُقُفًا مِنْ فَضَّةٍ} [الزخرف: 33] الآيةَ. وقال - صلّى الله عليه وسلّم - لِعُمرَ: " أمَا تَرْضَى أنْ يكونَ لَهم الدّنيا ولَنا الآخِرةَ".

(مرقاة المفاتيح، كتاب الرقاق، 8/3241، رقم:5177، ط: دار الفكر- بيروت)

ترجمہ:

’’یعنی  اگر دنیا اللہ تعالی کےہاں مچھر کے پَر کے  مساوی اور برابر ہوتی۔"جناحَ بعوضةٍ"یعنی مچھر کا پَر، اوریہ قلت اور حقارت کی مثال ہے،مراد  یہ ہے کہ  اگر اس (دنیا) کی ( اللہ تعالی کے ہاں)   معمولی  قدر بھی ہوتی توکسی کافر کو دنیاکے کسی سمندر سے ایک گھونٹ  پانی  بھی نہ پلاتے، یعنی  اللہ تعالی  اس دنیا سے کافر کو معمولی فائدہ اٹھانے بھی نہ دیتے؛ اس لیے کہ  کافر اللہ تعالی  کا دشمن ہے، اور دشمن  کو ایسی چیز نہیں دی جاتی  جس  چیز کی دینے والے کے ہاں  کوئی قدر ہو۔ اللہ تعالی کے ہاں دنیا کی حقارت میں سے یہ ہے کہ  وہ اپنے اولیاء کو یہ دنیا نہیں دیتے ، جیساکہ حدیث:"إنّ اللهَ يَحْمِيْ عبدَه المُؤْمنَ عنِ الدّنيا، كما يَحْمِيْ أحدُكم المريضَ عنِ الماءِ"میں اس کی طرف اشارہ ہے(یعنی بلاشبہ اللہ تعالی اپنے مومن بندے کو دنیا  سے ایسے بچاتے ہیں جیسے  تم میں سے کوئی اپنے بیمار کو پانی سے بچاتا ہے)۔۔۔ اور اللہ تعالی کے ہاں اس دنیا کے گھٹیا پن میں سےیہ  ہے کہ وہ  کفاروفجار کو یہ دنیا بہت دیتے ہیں، بلکہ  اللہ تعالی فرماتے ہیں:"{وَلَوْلَا أَنْ يَكُونَ النَّاسُ أُمَّةً وَاحِدَةً لَجَعَلْنَا لِمَنْ يَكْفُرُ بِالرَّحْمَنِ لِبُيُوتِهِمْ سُقُفًا مِنْ فَضَّةٍ} [الزخرف: 33] (ترجمہ:اگر یہ بات نہ ہوتی کہ تمام آدمی ایک ہی طریقے کے ہوجاویں گے  تو  جولوگ خدا کے ساتھ کفر کرتے ہیں  ہم اُن کے لیے اُن کے گھروں کی چھتیں چاندی کی  کردیتے (بیان القرآن) نیز نبی کریم  صلی اللہ علیہ وسلم نے (حضرت) عمر (رضی اللہ عنہ ) سے فرمایا:"أمَا تَرْضَى أنْ يكونَ لَهم الدّنيا و لَنا الآخِرةَ"(یعنی کیا تمہیں یہ بات پسند نہیں کہ ان کفار  کے لیے دنیا ہو اور ہمارے لیے آخرت ہو)‘‘۔

۳۔امام ترمذی رحمہ اللہ مذکورہ روایت کا حکم بیان کرتے ہوئے لکھتے ہیں:

"هَذا حديثٌ صحيحٌ، غريبٌ مِنْ هَذا الوجهِ."

(المصدر السابق)

ترجمہ:

’’یہ حدیث صحیح (اور) اس طریق سے غریب ہے(یعنی حدیث کے مذکورہ الفاظ صرف اسی سند میں مذکور ہیں،  البتہ اس کے ہم معنی الفاظ دیگر   احادیث  میں موجود ہیں جن سے اس کے معنی کی تائید ہوتی ہے)‘‘۔

خلاصہ یہ کہ  مذکورہ حدیث سند کے اعتبار سے صحیح اور اس طریق سے غریب ہے، اور  اس کے ہم معنی الفاظ دیگر احادیث میں موجود ہیں جن سے اس کے  معنی کی تائید ہوتی ہے، لہذا اسے بیان کیا جاسکتا ہے۔