سوال

 اگر  رشتہ  کرنے  کے  لیے استخارہ کیا جائے تو  ایسا ممکن  ہے  کہ دونوں فریقین کا استخارہ الگ الگ آئے ؟   مطلب ایک میں ہاں،  اور دوسرے فریق کے پاس نہیں آئے؟

جواب

کسی  جائز معاملے  میں جب تردد ہو تو اس کی بہتری والی جہت معلوم کرنےکےلیےاستخارہ کیا جاتا ہے، اور یہ مسنون عمل ہے،حضورِ اکرم صلی اللہ علیہ وسلم کی احادیث سے اس کی ترغیب ملتی ہے، نیز احادیث کی رو سے یہ پتا چلتا ہے کہ جس شخص کی حاجت ہو وہ خود استخارہ کرے۔

      استخارہ کا مسنون طریقہ یہ ہے کہ دن رات میں کسی بھی وقت بشرطیکہ وہ نفل کی ادائیگی کا مکروہ وقت نہ ہو دو رکعت نفل استخارہ کی نیت سے پڑھیں،نیت یہ کرے کہ میرے سامنے یہ معاملہ یا مسئلہ ہے ، اس میں جو راستہ میرے حق میں بہتر ہو ، اللہ تعالی اس کا فیصلہ فرمادیں ، سلام پھیر کر نماز کے بعد استخارہ کی مسنون دعا مانگیں جو حضور صلی اللہ علیہ وسلم نے تلقین فرمائی ہے، استخارہ کی مسنون دعا  یہ ہے:

" اَللّٰهُمَّ إِنِّيْ أَسْتَخِیْرُكَ بِعِلْمِكَ، وَ أَسْتَقْدِرُكَ بِقُدْرَتِكَ، وَ أَسْأَلُكَ مِنْ فَضْلِكَ الْعَظِیْمِ ، فَإِنَّكَ تَقْدِرُ وَ لاَ أَقْدِرُ، وَ تَعْلَمُ وَلاَ أَعْلَمُ ، وَ أَنْتَ عَلاَّمُ الْغُیُوْبِ اَللّٰهُمَّ إِنْ كُنْتَ تَعْلَمُ أَنَّ هٰذَا الْأَمْرَ خَیْرٌ لِّيْ فِیْ دِیْنِيْ وَ مَعَاشِيْ وَ عَاقِبَةِ أَمْرِيْ وَ عَاجِلِه وَ اٰجِلِه ، فَاقْدِرْهُ لِيْ، وَ یَسِّرْهُ لِيْ، ثُمَّ بَارِكْ لِيْ فِیْهِ وَ إِنْ كُنْتَ تَعْلَمُ أَنَّ هٰذَا الْأَمْرَ شَرٌ لِّيْ فِيْ دِیْنِيْ وَمَعَاشِيْ وَ عَاقِبَةِ أَمْرِيْ وَ عَاجِلِه وَ اٰجِلِه ، فَاصْرِفْهُ عَنِّيْ وَاصْرِفْنِيْ عَنْهُ، وَاقْدِرْ لِيَ الْخَیْرَ حَیْثُ كَانَ ثُمَّ أَرْضِنِيْ بِه". (بخاري،ترمذي )

دعاکرتے وقت جب ”هذا الأمر“ پر پہنچے تو اگر عربی جانتا ہو تو اس جگہ اپنی حاجت کا تذکرہ کرے یعنی ”هذا الأمر“کی جگہ اپنے کام کا نام لے، مثلاً: ”هذا السفر “یا ”هذا النکاح“یا ”هذه التجارة“ کہے ، اور اگر عربی نہیں جانتا تو ”هذا الأمر“ کہہ کر دل میں اپنے اس کام کے بارے میں سوچے اور دھیان دے جس کے لیے استخارہ کررہا ہے، استخارے کے بعد  جس طرف دل مائل ہو وہ کام کرے،اگر ایک دفعہ میں قلبی اطمینان حاصل نہ ہو تو سات  مرتبہ یہی عمل دہرائے، ان شاء اللہ خیر ہوگی، استخارہ کے لیے کوئی وقت خاص نہیں، البتہ بہتر یہ ہے کہ رات میں سونے سے پہلے جب یکسوئی کا ماحول ہو تو استخارہ کرکے سوجائے، لیکن خواب آنا ضروری نہیں ہے، بلکہ اصل بات قلبی رجحان اور اطمینان ہے۔

 استخارہ کے بعد اس کے مطابق عمل کرنا اگرچہ لازمی نہیں ہے، البتہ بہتر ہے  اور اس کے خلاف عمل کرنا اگرچہ جائز ہے، لیکن نقصان کا اندیشہ ہے، اس لئے اگر لڑکے اور لڑکی والوں کے استخارہ کرنے کی صورت میں دونوں فریقوں میں سے کسی ایک کو رشتہ کرنے میں اطمینان ہو لیکن دوسرے کو اطمینان نہ ہو تو ایک کا استخارہ دوسرے کے  لیے حجت نہیں ہے، ہر ایک فریق اپنے قلبی رجحان اور اطمینان کے مطابق عمل کرنے کا حق رکھتا ہے، لہٰذا استخارہ کرنے کے بعد جس فریق کو رشتہ پر اطمینان نہ ہو تو وہ اس رشتہ سے منع کرسکتا ہے  چاہے دوسرے فریق کا دل استخارہ کے بعد رشتہ پر مطمئن کیوں نہ ہو۔   فقط واللہ اعلم